ءار ەلدىڭ سالتى باسقا: تۋريستەردى تاڭ قالدىراتىن قىزىقتى زاڭدار

استانا. قازاقپارات - ​جەر بەتىندە بەلگىلى ءبىر نارسەلەرگە تىيىم سالمايتىن ەل جوق. كەيدە سونىڭ ىشىندە قىزىقتىلارى دا كەزدەسىپ جاتادى. سونىمەن قاي ەلدە نەگە تىيىم سالىنعانىنا بىرگە شولۋ جاسايىق.

ەگەر ءسىز شەت ەلدەرگە ساياحاتتاۋدى جوسپارلاپ وتىرعان بولساڭىز، قاي ەلدە نەگە تىيىم سالىناتىنىن بىلگەنىڭىز ابزال.

اۋستراليا

جەكسەنبى كۇنى تۇستەن كەيىن قوعامدىق ورىنداردا قىزعىلت ءتۇستى شالبار كيىپ جۇرۋگە تىيىم سالىنادى.

كۇيىپ كەتكەن شامداردى الماستىرۋعا ارەكەتتەنبەڭىز. سەبەبى بۇل ەلدە مۇنداي قۇقىق تەك بىلىكتى ماماندارعا تيەسىلى. ايتپەسە ايىپپۇل تولەۋگە ءماجبۇر بولاسىز.

انگليا

كوشەدە كىلەمدى سىلكۋگە جانە تازالاۋعا تىيىم سالىنادى. نازار اۋدارىڭىز، ەگەر ءسىز كىلەمدى تىنىعۋ كەزىندە تازالاعىڭىز كەلسە، وندا تاڭعى ساعات 08:00-گە دەيىن ۇلگەرۋىڭىز كەرەك.

ساعات 07:00 - 22.00 ارالىعىندا كوشەدە ءىرى قارا مالدى باعۋعا تىيىم سالىنادى، بۇل ءۇشىن پولتسيانىڭ ارنايى رۇقساتى بولۋى ءتيىس.

تەمىرجول ۆوكزالىندا سۇيىسۋگە تىيىم سالىنعان. ءتىپتى مۇنداي ارنايى بەلگىلەر دە قويىلعان. بيلىك جولاۋشىلاردىڭ پەرروندا تۇرىپ ۇزاق قوشتاسۋى وندا كەپتەلىستىڭ ورىن الۋىنا سەبەپشى بولۋى مۇمكىن دەپ ەسەپتەيدى.

يتاليا

2008 -جىلدان باستاپ ۆەنەتسيادا سان- ماركو الاڭىندا كوگەرشىندەردى تاماقتاندىرۋعا تىيىم سالىنعان. سەبەبى، كوگەرشىندەر قاۋىپتى اۋرۋلاردى تاراتادى جانە ولار تاريعي عيماراتتار مەن ەسكەرتكىشتەردىڭ بۇلىنۋىنە سەبەپشى بولادى.

ۆەنەتسيانىڭ جانىنداعى ەراكلەيا قالاسىندا جاعاجايدا قۇمنان قورعاندار سالۋعا تىيىم سالىنعان، سەبەبى ولار جاعالاۋدا قىدىرىپ جۇرگەن ادامدارعا «كەدەرگى كەلتىرۋى مۇمكىن».

ەبولي قالاسىندا عاشىقتاردىڭ كولىكتە سۇيىسۋىنە بولمايدى.

يتاليانىڭ كاپري ارالىندا اعاش تاباندى اياق كيىمدى، سونداي- اق كەز كەلگەن قاتتى دىبىس شىعاراتىن اياق كيىمدەردى كيۋگە تىيىم سالىنادى.

سينگاپۋر

«قانتسىز «وربيت» ساعىز شاينايتىندار جازاعا تارتىلادى. سەبەبى مۇندا ساعىز اكەلۋگە جانە شايناۋعا تىيىم سالىنادى. بۇل ەرەجە 1992 -جىلى قابىلدانعان. بۇل ەلدە ساعىز دەنساۋلىققا قاتتى زيان كەلتىرەدى جانە قورشاعان ورتانى لاستاۋى مۇمكىن دەگەن قاعيدا بار.

كانادا

كانادادا زاڭ بويىنشا دۇيسەنبىدەن جۇماعا دەيىن ساعات 06.00 - 18.00 ارالىعىندا راديو ەفيرىندە %35  تەك ۇلتتىق كونتەنت تاراتىلادى.

  جاپونيا

2008 -جىلى ەلدە 40-74 جاس ارالىعىنداعى تۇرعىنداردىڭ بەلىنىڭ ولشەمىن جىل سايىن باقىلاۋعا الۋ ەنگىزىلدى (ەركەكتەردە 86 س م اسپاۋى، ال ايەلدەردە 90 س م بولۋى ءتيىس). جاپونيادا سەمىزدىكپەن جانە ودان تۋىندايتىن اۋرۋلارمەن وسىلايشا كۇرەسەدى. 2015 -جىلى اتالعان كورسەتكىشتەردى ورىنداماعان كومپانيالارعا ايىپپۇل سالىندى.

ءۇندىستان

2016 -جىلى ءۇندىستاننىڭ كەرالا شتاتىندا ارتىق سالماققا قارسى كۇرەسۋ ءۇشىن «مايلى تاماققا سالىق» سالىندى - مەيرامحانالارداعى گامبۋرگەرگە، پيتستساعا، مايلى بالىشكە جانە باسقا دا مايلى تاعامدارعا % 14,5  كولەمىندە.

دەرەككوزى: Adme.ru