سەمەيلىك ءمۇسىنشىنىڭ تۋىندىلارىنا سۇرانىس جوعارى - فوتو
ول مۇسىندەردى سوعۋمەن 13 جىلدان بەرى اينالىسىپ كەلەدى. كوبىنە مونۋمەنتالدى مۇسىندەر، دەپ حابارلايدى قازاقپارات.
بالا كەزىنەن ءمۇسىنشى بولۋدى ارمانداپ، وسى سالانىڭ قىر- سىرىنا قانىعۋ ءۇشىن الدىنا ۇلكەن ماقساتتار قويادى. 5 -سىنىپتان 9- سىنىپقا دەيىن كوركەمونەر مەكتەبىندە ءبىلىم الادى. كەيىننەن 1997 -جىلى رەسپۋبليكالىق كوركەمونەر كوللەدجىنە وقۋعا ءتۇسىپ، اياقتاعاننان كەيىن (2000 -جىلى) قازاق ۇلتتىق ونەر اكادەمياسىندا «كەسكىندەمە جانە ءمۇسىن» ماماندىعى بويىنشا ءبىلىمىن جەتىلدىرەدى.
تۋمىسىنان ونەردىڭ ەرەكشە تۇرىنە قىزىعۋشىلىق تانىتقان نۇربولدىڭ بۇگىنگى كۇنى قولىنان شىققان 10 عا جۋىق تۋىندىسى بار.
«ءمۇسىن جاساۋعا قىزىعۋشىلىعىم باستاۋىش سىنىپتى وقىپ جۇرگەندە باستالدى. وسىنى بايقاعان اتا- انام مەنى كوركەمونەر مەكتەبىنە بەردى. وسىلاي تالابىمدى ۇشتادىم. قازىر بالا كەزدەگى ماقساتىما جەتتىم. ءوزىمدى ءتىپتى باسقا سالادا ەلەستەتىپ كورگەن ەمەسپىن»، - دەيدى نۇربول.
جاس ءمۇسىنشىنىڭ قولىنان شىققان مونۋمەنتتەرى استانا، الماتى، باقاناس سياقتى ءبىرقاتار قالالاردىڭ كوشەلەرىندە تۇر. ال شىعىس قازاقستان وبلىسىندا 3 مونۋمەنتى ورنالاسقان ەكەن. سولاردىڭ ءبىرى اباي اۋدانىنىڭ قاراۋىل اۋىلىندا ۇلى ابايدىڭ اكەسى قۇنانباي وسكەنباي ۇلىنىڭ ەسكەرتكىشى. بالقاشتىڭ مىسىنان قۇيىلعان تۋىندىنىڭ سالماعى 12 توننا، بيىكتىگى تۇعىرىمەن العاندا 7 مەتر. نۇربول ەسكەرتكىشتى جاساۋعا 10 اي ۋاقىت جۇمساعان. تاعى ءبىر ۇلكەن تۋىندىسى جارما اۋدانىندا «تۋعان جەر» باعدارلاماسى اياسىندا زاڭعار جازۋشى مۇحتار اۋەزوۆكە ورناتىلعان ەسكەرتكىش. مىستان جاسالعان ءمۇسىننىڭ بيىكتىگى تۇعىرىمەن العاندا 6 مەتر. جاس ءمۇسىنشى بۇل تۋىندىنى دا جاساۋعا بىرنەشە اي ۋاقىتىن جۇمساپتى. اياگوز قالاسىندا تۇرعان ايگىلى جىراۋ، باتىر اقتامبەردى سارى ۇلىنىڭ ەسكەرتكىشى دە نۇربولدىڭ قولىنان شىققان.
«كوبىنە مۇسىندەردى قولا، گرانيت تاس پەن مىستان جاسايمىن. كولەمى مەن ساپاسىنا بايلانىستى ءارتۇرلى ۋاقىت كەتەدى. كەيدە ءبىر ەسكەرتكىش جاساۋ ءۇشىن بىرنەشە ادام بىرىگىپ ىستەيمىز. ۇلكەن شىدامدىلىق كەرەك. ءبىر ەتاپتىڭ ءوزى بىرنەشە اپتا، كۇننەن تۇرادى جانە فانتازيا، يدەيا مىقتى بولۋ كەرەك. ويتكەنى، ءمۇسىنشى ءوز ەسكەرتكىشى ارقىلى حالىقتى تاربيەلەيدى»، - دەيدى ءمۇسىنشى.
قازىر نۇربول شىعىس قازاقستان وبلىسى زايسان قالاسىندا ورناتىلاتىن بايمۇرات باتىر ەسكەرتكىشىن جاساپ جاتىر.
شىنار عالىمبەك قىزى
