قازاقتاردىڭ ات شاناسى تۋريستەردىڭ دەمالىس كولىگىنە اينالۋدا - شەتەلدەگى قازاق ءتىلدى ب ا ق- قا شولۋ

استانا. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە اقپارات تاراتاتىن ب ا ق كوزدەرىنە وسى اپتاداعى شولۋىن ۇسىنادى.

قازاقي ات شاناعا وتىرىپ كوردىڭىز بە؟ - «اعاجاي- التاي» پورتالى

  

قازىرگى نارىق تالابىنا ساي، التاي ايماعىنىڭ ءار اۋدانى قار جامىلعان كورىكتى مەكەننىڭ ارتىقشىلىعىن حالىقتىڭ ەكونوميكالىق جاعدايىن دامىتۋعا ءتيىمدى پايدالانادى. سونىڭ ءبىر ءتۇرىنىڭ يگىلىگىن شۇڭقىرلىق قازاقتار كورۋدە. ات شانا - جەرگىلىكتى قازاق باقتاشىلارىنىڭ تاۋلى وڭىرلەردە ەجەلدەن قولدانىپ كەلە جاتقان قىسقى قاتىناس قۇرالى ەسەپتەلەدى. بۇل تۋرالى وسى اپتادا kazakh.altxw.com اقپاراتتىق پورتالى حابارلاعان بولاتىن.

 

ات شانا - تەك قىسقى ماۋسىمنىڭ قۇرالى ەكەنى بارىمىزگە بەلگىلى. بۇل فوتورەپورتاجدان ۇلتىمىزدىڭ ۇمىت بولۋعا اينالعان وسى سياقتى تۇرمىستىق مۇرالارى قايتادان زاماناۋي ۇلگىدە جاڭعىرۋعا بەت العانىن اڭعارۋعا بولادى. بۇل ايماقتا اتقا جەگىلىپ، ات تەبىنىمەن قوسا سىرعانايتىن بۇنداي قۇرال بۇرىنعى ۋاقىتتا ءاربىر وتباسىندا بولاتىن قىسقى قاتىناس كولىگى ەدى. ءدال بۇگىنگى كۇنگە جەتكەندە، ات شانا اۋەلگىدەي تەك قاتىناس قۇرالى ەمەس، وسى وڭىرگە كەلگەن ءتۇرلى ۇلت تۋريستەرىنىڭ ەڭ كوپ نازار اۋداراتىن دەمالىس كولىگى رەتىندە پايدالانادى ەكەن.

 

«مىنەكەي، التاي ايماعى بۋىرشىن اۋدانى شۇڭقىر قالاشىعى ساياحاتىنىڭ جاڭا ءبىر ءبولىمى رەتىندە ات شانا كورىنىسىن وقىرمانعا تارتۋ ەتىپ وتىرمىز. سىزدە شۇڭقىرعا كەلىپ قازاقي ات شاناعا وتىرىپ، تابيعاتتىڭ تاماشا كورىنىسىنەن بىزبەن بىرلىكتە ءلاززاتتانىڭىز!» دەپ جازادى اتالعان اقپارات كوزى.

 

قىتايدىڭ ەڭ تانىمال مەرەكەلىك كونسەرتىندە ابايدىڭ قارا سوزدەرى وقىلدى - cctv.com

 

وسى اپتادا كۇللى قىتايلىقتار ءۇشىن ەڭ ۇلىق سانالاتىن كوكتەم مەرەكەسى باستالدى. وسىنداي اتاۋلى مەرەكەگە دايىندىق ايلار بۇرىن باستالىپ، مەملەكەتتىك ءىس- شارالاردا ەڭ ماڭىزدى دەگەندەرى سۇرىپتالىپ، مەرەكەلىك كونسەرتتە حالىققا ۇسىنىلادى. ايتا كەتەرلىگى، قىتاي حالىق رەسپۋبليكاسىنىڭ باستى تەلەارنالارىنىڭ ءبىرى بيىلعى مەرەكەلىك كونسەرتىندە قازاقتىڭ ۇلى اقىنى ابايدىڭ دانالىق سوزدەرىن وقىسا، سول ساحنادا تانىمال ءانشى ديماش قۇدايبەرگەن ونەر كورسەتتى.

اتاپ ايتقاندا، قىتايدىڭ تانىمال اكتەرى ورتالىق تەلەارنانىڭ (CCTV) «2018 -جىلعى كوكتەم مەرەكەسىنىڭ ساۋىق كەشى» كونسەرتىندە قازاقتىڭ ۇلى اقىنى اباي قۇنانبايەۆتىڭ قارا سوزىنەن ءۇزىندى كەلتىردى. قىتايعا تانىمال تەاتر جانە كينو اكتەرى، ساتيريك فىڭ گۋڭنىڭ اۆتورلىعىمەن دايىندالعان «جانىم جىرعا جاقىن» قويىلىمىندا ولەڭ ايتۋدان باسەكەلەسكەن ەكى اكتەردىڭ ءبىرى اباي قۇنانبايەۆتىڭ 37- قارا سوزىنەن ءۇزىندىنى كەلتىردى. ول:

«دۇنيە - ۇلكەن كول،

زامانا - سوققان جەل.

الدىڭعى تولقىن - اعالار،

كەيىنگى تولقىن - ىنىلەر،

كەزەكپەنەن ولىنەر،

 باياعىداي كورىنەر» دەگەن جولداردى الدىمەن قىتاي تىلىندە وقىدى، سوسىن قارسىلاسىنىڭ تالابى بويىنشا قازاق تىلىندە دە وقىپ بەردى.

ايتا كەتەيىك، ءدۇبىرلى مەرەكەلىك كەشكە قىتايدىڭ ەڭ تانىمال ونەر ادامدارىمەن بىرگە، قازاقستاندىق ءانشى ديماش قۇدايبەرگەن دە ارنايى قاتىسىپ، ونەر كورسەتتى.

«كوكتەم مەرەكەسى ساۋىق كەشى» 1983 -جىلدان بەرى جىل سايىن قىتايدىڭ جاڭا جىل مەرەكەسى كۇنى CCTV تەلەارناسىندا تىكەلەي ەفيردەن كورسەتىلىپ كەلەدى. 2012 -جىلى مەرەكەلىك كەش ەڭ كوپ كورەرمەن جيناعان كونسەرت رەتىندە گيننەستىڭ رەكوردتار كىتابىنا ەنىپ، 2016 -جىلى الەمدە بۇل كونسەرتتى 1 ميللياردتان استام ادام تاماشالاعان بولاتىن.

 

ماعجانعا انكاراداعى تاعزىم - TRT

 

الاشتىڭ اقيىق اقىنى ماعجان جۇمابايەۆتىڭ تۋعانىنا 125 جىل تولۋىنا وراي انكارادا ەسكە الۋ شاراسى ءوتتى. بۇل تۋرالى وسى اپتادا تۇركيا راديو تەلەديدار پورتالى دا حابارلادى.

ايتۋلى حالىقارالىق كونفەرەنسيانى تۇرىك مادەنيەتىنىڭ حالىقارالىق ۇيىمى تۇرىكسوي ۇيىمداستىرىپ، قازاقستاننىڭ تۇركياداعى ەلشىلىگى، تۇركيا مادەنيەت جانە تۋريزم مينيسترلىگى، انكاراداعى كەچيورەن اۋدانىنىڭ باسشىلىعى قولداۋ بىلدىرگەن.

«تۇركىستان ەكى دۇنيە ەسىگى عوي، تۇركىستان ەر تۇرىكتىڭ بەسىگى عوي» دەگەن ۇرانمەن وتكىزىلگەن كونفەرەنسياعا قازاقستاننان ماعجانتانۋشىلار دا ارنايى كەلگەن. «سونداي-اق، اتالعان كونفەرەنسيادا ماعجان جۇمابايەۆ جونىندە قىسقاشا فيلم دە كورسەتىلدى» - دەپ جازدى تۇركيا راديو تەلەديدار پورتالى.

كاپپادوكياعا قىتايلىق تۋريستەر اعىلۋدا - TRT

 

ءدال وسىنداي مازمۇنداعى اقپارات تۋريستىك ەل تۇركيانىڭ TRT پورتالىندا جارىق كوردى. قىتايلىق تۋريستەردىڭ اتالعان وڭىرگە اعىلۋىنا قىتاي حالىق رەسپۋبليكاسىندا 2018 -جىلدىڭ «تۇركياداعى تۋريزم جىلى» دەپ جاريالانۋى باستى سەبەپتىڭ ءبىرى بولىپ وتىر دەپ جازدى تۇركيا راديو تەلەديدار اقپارتتىق پورتالى.

پەرى مۇرجالارى، سايلارى، جەراستى قالالارى، شىركەۋلەرى، كەرۋەن سارايلارى مەن مادەني عيماراتتارىنىڭ مىڭداعان جىلدىق وركەنيەتتىڭ ىزىنە يە كاپپادوكيا ءار جىلى كوپتەگەن ءتۋريستى كۇتىپ الۋدا. «قىتاي حالىق رەسپۋبليكاسىندا 2018 -جىلدىڭ «تۇركياداعى تۋريزم جىلى» دەپ جاريالانۋىنا وراي بيىل قىتايلىق تۋريستتەر كاپپادوكياعا قاتتى قىزىعۋشىلىق تانىتۋدا. سوندىقتان وتكەن جىلمەن سالىستىرعاندا كاپپادوكياعا ءتىپتى دە كوپ قىتايلىق تۋريستىڭ كەلەتىنىنە كۇمان جوق» دەپ جازادى TRT.

قىتايلىق ۋنيۆەرسيتەت توتەنشە جاعدايلاردا كومەك كورسەتەتىن روبوت ويلاپ تاپتى - «جەنمين جيباو» (People Daily)

 

جاقىندا جىجياڭ ۋنيۆەرسيتەتىنىڭ روبوت زەرتتەۋ ورتالىعى توتەنشە جاعدايلاردا ادامدارعا كومەك جاساي الاتىن «كولەڭكەلى» دەپ اتالاتىن ءتورت اياقتى روبوتتى قۇراستىرىپ شىعاردى. بۇل وسى اپتادا قىتايداعى قازاق ءتىلدى ب ا ق- تاردا جارىق كورگەن، عىلىمي جوبالارعا بايلانىستى قىزىقتى اقپاراتتاردىڭ ءبىرى دەۋگە بولادى.

 

اتالعان روبوتتىڭ ۇزىندىعى ءبىر مەتر، ءتورت اياقتاپ تۇرعاندا بيىكتىگى 60 سانتيمەتر، ءوز سالماعى 70 كەلى بولىپ، 20 كەلىلىك زاتتى الىپ جۇرە الادى، ءجۇرۋ جىلدامدىعى ساعاتىنا 6 كيلومەتر بولعانىمەن، ەكى ساعات بويى توقتاۋسىز ءجۇرۋ مۇمكىندىگى بار ەكەن.

 

«قازىر «كولەڭكەلى» روبوت جۇگىرىپ-سەكىرۋ، باسپالداققا ورمەلەۋ، شاعىل تاستاردا ءجۇرۋ، تىزەسىن بۇگۋ سىندى مۇمكىندىكتەردى يگەرگەن. «ونىڭ باستى ەرەكشەلىگىنىڭ ءبىرى جىعىلىپ قالسا دا، وزدىگىنەن قايتادان تۇرا الادى» دەيدى «كولەڭكەلىنى» جاساعان ماماندار. اتالعان روبوت ادامداردى امان الىپ قالۋ، بارلاۋ، اپاتتان قۇتقارۋ سەكىلدى توتەنشە جاعدايلاردا قولدانىلادى» دەپ جازادى People Daily.

ي. شاياحمەت ۇلى: شارشى الاڭدا توپ جارىپ، بيىك تۇعىردان كورىنۋگە تىرىسامىن - kaznews.mn

 

موڭعوليالىق كيكبوكسينگ شەبەرى، قانداسىمىز يسلاماللابەك شاياحمەت ۇلى تايلاند استاناسى ۆانكگوك قالاسىندا وتەتىن ازيا چەمپيوناتىنا قاتىسادى. موڭعوليالىق ب ا ق- قا بەرگەن سۇحباتىندا ول وسىلاي دەپ مالىمدەدى.

بۇل ەكسكليۋزيۆتى سۇحباتىندا كيكبوكسينگ شەبەرى 12-17 -ناۋرىزدا تايلاند استاناسى ۆانكگوك قالاسىندا وتەتىن ازيا چەمپيوناتىنا قاتىسۋعا ارنالعان ارنايى جولدامانى جەڭىپ العانى تۋرالى ايتقان.

سايتتىڭ جازۋىنشا، ازيا چەمپيوناتى ءۇشىن ۆانكگوكتا بولاتىن دايىندىققا موڭعوليادان 4 سپورتشى الدىن الا اتتانىپ كەتكەن. ايتا كەتەرلىگى، چەمپيوناتقا باراتىن سپورتشىلارعا مەملەكەت تاراپىنان ەشقانداي قارجىلىق قولداۋ كورسەتىلمەيدى. سوندىقتان سپورتشىلار بارلىق شىعىندى ءوز قالتاسىنان كوتەرۋگە تۋرا كەلەدى. سپورتتىق كارەراسىن كوتەرۋ ءۇشىن بۇنداي وڭتايلى ءساتتى وتكىزىپ الماۋ ماقساتىندا وزىنە قولداۋشىلار تاپقانىن ايتادى كيكبوكسينگ شەبەرى يسلاماللابەك شاياحمەت ۇلى.

ونىڭ مالىمەتىنشە، قارجىلاي قولداۋ ەل ازاماتتارىنان بولماق. «سپورتتى تۇسىنەتىن اسقار، تىلەۋبەردى مۇرات ۇلى، سامارحان كەلدەك ۇلى قاتارلى ءبىراز ازاماتتار قولداۋ كورسەتىپ وتىر. ەندى وسىنداي قولداۋدىڭ ارقاسىندا تايلاند استاناسىنداعى وقۋ جاتتىعۋعا قاتىسىپ، جارىس كۇنى شارشى الاڭدا توپ جارىپ، بيىك تۇعىردان كورىنۋگە تىرىسامىن» دەيدى موڭعوليالىق قانداسىمىز.

قازاق قىزى موڭعوليا كورەرمەندەرىن ءوز ونەرىمەن ءتانتى ەتتى - KAZNEWS

 

«Voice of Mongolia» شوۋىنىڭ قاتىسۋشىسى موڭعوليالىق قانداسىمىز ەركەجان كوگەرشىن قىزى كورەرمەندەردى ءوز تالانتىمەن ءتانتى ەتىپ، كوپشىلىكتىڭ ەرەكشە ىقىلاسىنا بولەندى. بۇل تۋرالى موڭعولياداعى KAZNEWS اقپاراتتىق پورتالى حابارلادى.

 «ءانشى س. ناراننىڭ «نۋتگاا ساناحۋي» ءانىن تاماشا ورىندادى. ءادىلقازىلاردىڭ بارلىعى دا قازاق قىزىنا جوعارى باعا بەردى. ءوز كەزەگىندە ەركەجان كوگەرشىن قىزى بۇل شوۋدا تالىمگەرى رەتىندە وزىنە كيۆي توبىنىڭ ءانشىسى ۋكانى تاڭدادى» دەپ جازادى اتالعان اقپارات كوزى.

  

اۆتور: بەيسەن سۇلتان ۇلى