قازاق حالقىنا العىس ايتۋ كۇنى: وڭتۇستىكتە كورشىلەر داستارحانداس بولدى - فوتو
1 -ناۋرىز - العىس ايتۋ كۇنى قارساڭىنداعى ونكۇندىك شاراسى اياسىندا ۇيىمداستىرىلعان شارادا اۋىلدارىنىڭ اقساقالدارى مەن بەلدى ازاماتتارىن داستارحان باسىنا شاقىرىپ، كەزدەسۋ وتكىزدى، دەپ حابارلايدى قازاقپارات ءتىلشىسى.
وبلىس اكىمى جانسەيىت تۇيمەبايەۆتىڭ باستاماسىمەن قولعا الىنعان شارا بارىسىندا كورشى ورنالاسقان سايرام اۋدانى قارابۇلاق ەلدى مەكەنىنىڭ تۇرعىندارى تۇلكىباس اۋدانى مىڭباي، جامبىل اۋىلدارىنىڭ اقساقالدارى كەزدەستى. كورشىلەر اراسىنداعى قارىم-قاتىناستى بەكەمدەۋ جانە كورشىگە قۇرمەت كورسەتۋ ماقساتىندا تۇرعىندار ءبىر-ءبىرىن داستارحان باسىنا شاقىرىپ، جۇزدەستى. ءبىر-بىرىنە ءىلتيپات كورسەتىپ، جەرگىلىكتى ەتنوس وكىلدەرى قازاق ۇلتىنا دەگەن اقەدىل العىسىن ءبىلدىردى.
يگى شاراعا وبلىس اكىمىنىڭ ورىنباسارى ۇلاسبەك سادىبەكوۆ قاتىسىپ، ەلدىڭ بىرلىگى، ەتنوسارالىق تاتۋلىقتى ساقتاۋدىڭ ماڭىزىنا توقتالدى.
«بىرلىگىمىزدى كوزدىڭ قاراشىعىنداي ساقتاپ، ونىڭ قادىرىن جەتە ۇعىنساق، اۋىل-ايماقتاعى «تەنتەكتەرىمىزدى» ۋاقتىلى تىزگىندەپ وتىرساق، ءبىز بارلىق اسۋلاردان اسامىز. ال، ىشكى تاتۋلىقتىڭ قادىرىن ءبىلۋ، ونى تەرەڭىنەن ءتۇيسىنۋ، بايىپتى باعامداۋ سىزدەر مەن بىزدەرگە جۇكتەلىپ وتىرعان اۋقىمدى جاۋاپكەرشىلىك ەكەنىن ۇعىنۋعا مىندەتتىمىز»، - دەدى وبلىس اكىمىنىڭ ورىنباسارى.
مۇنداي ءىس-شارالار ءوڭىردىڭ بارلىق اۋدان قالالارىندا ۇيىمداستىرىلدى. وبلىس كولەمىندە وتكەن مەرەكەلىك جيىندارعا انالار جانە قوعامدىق كەلىسىم كەڭەستەرى، ەتنومادەني بىرلەستىكتەر جانە ءتۇرلى كلۋبتاردان قۇرالعان 500-دەن استام ۇجىم اتسالىستى. قاتىسۋشىلار «كورشىگە ىزەت» تاقىرىبىندا كورشىلەر اراسىنداعى سىيلاستىق پەن اۋىزبىرشىلىكتى جانە كورشىنى قۇرمەتتەۋ تۋرالى ناسيحات جۇمىستارىن جۇرگىزدى.
ايتا كەتەيىك، وبلىستا جاڭا سيپاتتا ءارى جاڭا مازمۇندا باستاۋ العان مەرەكەلىك شارالار 1 -ناۋرىزعا دەيىن جالعاساتىن بولادى.
