اقمولا دارىگەرلەرى وڭەشسىز تۋعان بالانىڭ ءومىرىن ساقتاپ قالدى

كوكشەتاۋ. قازاقپارات - اقمولا وبلىستىق اۋرحاناسىنىڭ حيرۋرگيا بولىمشەسىنىڭ دارىگەرلەرى وڭەشسىز تۋعان بالانىڭ ءومىرىن ساقتاپ قالدى، دەپ حابارلايدى قازاقپارات ءتىلشىسى.

اقمولا وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ دەرەگى بويىنشا وتكەن جىلدىڭ 14 جەلتوقسانىندا اقمولا وبلىستىق پەريناتالدىق ورتالىعىندا اسقازان- ىشەك قۇرىلىسىندا، وڭەش، وكپە جانە بۇيرەگىندە كەمىستىگى بار ءسابي دۇنيەگە كەلدى.

 ءسابي بىردەن اقمولا وبلىستىق بالالار اۋرحاناسىنىڭ جانساقتاۋ بولىمىنە جاتقىزىلىپ، دارىگەرلەر شۇعىل وتا جاسادى. بولىمشەنىڭ مەڭگەرۋشىسى ەلەنا يۆانوۆا، باس دارىگەردىڭ حيرۋرگيا بويىنشا ورىنباسارى نۇرلان تۇسىپبەكوۆ، حيرۋرگيا بولىمشەسىنىڭ مەڭگەرۋشىسى ەرنار قوجابەكوۆ، دارىگەر - حيرۋرگ بولاتحان قازتايەۆ، پاتولوگيا جانە جاڭا تۋعان بالالار بولىمشەسىنىڭ مەڭگەرۋشىسى رايسا كەنجەبەكوۆانىڭ كاسىبي بىلىكتىلىكتەرىنىڭ ارقاسىندا ءسابي امان قالدى. دارىگەرلەر سابيگە تاماقتانۋ ءۇشىن پلاستيك وڭەش، جاساندى اۋىز قۋىسى (قورىتۋ جۇيەسىنىڭ باستالار مۇشەسى) سالدى.

«قازىر بالا ۇيىنە جىبەرىلدى. التى اي وتكەن سوڭ ۇلتتىق عىلىمي ورتالىقتا جاساندى وڭەش ورناتۋ بويىنشا وتا جاساۋ جوسپارلانعان»، دەپ ءتۇسىندىردى باس دارىگەردىڭ حيرۋرگيا بويىنشا ورىنباسارى نۇرلان تۇسىپبەكوۆ.

اۆتور: اسلان وسپانوۆ