ءماجىلىس جەر تۋرالى زاڭ جوباسىن ماقۇلدادى: قازاق جەرى شەتەلدىكتەرگە بەرىلە مە؟

استانا. قازاقپارات - ەلىمىزدە شەتەلدىكتەرگە جەردى ساتۋعا قاتىستى ۇسىنىس ءالى تاعى كوتەرىلۋى مۇمكىن، دەپ حابارلايدى ك ت ك.

بۇگىن ءماجىلىس جەر قاتىناستارى تۋرالى زاڭ جوباسىن ەكىنشى وقىلىمدا ماقۇلدادى. الايدا اۋىل شارۋاشىلىعى مينيسترلىگىندەگىلەردىڭ ايتۋىنشا، ەگىن ەگىپ، مال ۇستاۋعا ارنالعان تەلىمدەردى وزگە ەلدىڭ ازاماتتارىنا جالعا بەرۋ جانە ونى ساتۋعا سالىنعان موراتوريدىڭ مەرزىمى اياقتالعان سوڭ، ۇكىمەت اتالعان زاڭ جوباسىن قايتا قاراماق.

اۋىل شارۋاشىلىعى مينيسترلىگى الداعى 4 جىلدا جەردى، توپىراقتى ءجىتى زەرتتەپ، كىمدە قانشا گەكتار تەلىم بارىن انىقتاماق. ال بۇگىن تومەنگى پالاتا قابىلداعان زاڭ جوباسى ۋچاسكەلەردى شەتەلدىكتەرگە ساتۋ مەن جالعا بەرۋگە سالىنعان موراتوري اياقتالعانشا عانا جارامدى.

«موراتوري بىتكەنشە ءبىز ەگجەي-تەگجەيلى جۇمىستاردى قامتىپ بولعان سوڭ، ارينە، ەل بولىپ، بىرگە ناقتى شەشىم قابىلدانادى. موراتوري 2021 -جىلدىڭ 31 -جەلتوقسانىنان دەيىن بەلگىلەنگەن. ول ۋاقىتقا دەيىن ءبىز ءبارىمىز بىرىگىپ شەشىم قابىلدايمىز»، -  دەيدى اۋىل شارۋاشىلىق ۆيتسە- ءمينيسترى ەرلان نىسانبايەۆ.

ياعني، ازىرگە شەتەلدىكتەرگە جەر جوق. ال كەلەسى جىلدان باستاپ ەل ازاماتتارىنا جەر جاپپاي جالعا بەرىلەدى. اۋىل شارۋاشىلىعىنا ارنالعان ۋچاسكەلەردى وتانداستارىمىز 49 جىلعا دەيىن تەگىن پايدالانا الادى. ول ءۇشىن قولىڭىزدا بيزنەس جوسپار مەن اينالىساتىن كاسىبىڭىزگە قاجەتتى تەحنيكاڭىز تۇگەل بولۋى ءتيىس. كىمگە قانشا تەلىم بۇيىراتىنىن اكىمدەر شەشەدى. جالپى، قازىر ەلىمىزدە اۋىل شارۋاشىلىعىنا ارنالعان 102 ميلليون گەكتار جەر بار.

ونىڭ 1 جارىم ميلليونعا جۋىعىن جەكە كومپانيالار ساتىپ العان. قۇجاتتى جىلعا جۋىق تالقىلاپ، وزگەرىس ەنگىزگەن ماماندار مەن شەنەۋنىكتەر ول باپتاردى بۇعان دەيىن اتاعان ەمەس. ونى اۋىل شارۋاشىلىعى ۆيتسە- ءمينيسترىنىڭ ءوزى دە ازەر ايتتى.

«ول 24، 27، 34، 97، 101 باپتار. بۇل باپتار كەڭىنەن تالقىلاندى. كاسىبي زاڭگەرلەر ناقتىلادى، دالەلدەدى. ونىڭ ءبىرىنشىسى، قازاقستاندىقتارعا ءۇشىن جەردى جالعا بەرۋ نورماسىن ساقتاپ قالۋ، ەكىنشى، مولشەرىن شەكتەۋ، ءبىر قولعا كوپ جەر تيمەۋ جولىن قاراستىرۋ، ءۇشىنشى، شەكارالىق ايماقتارداعى اۋىل شارۋشىلىق ماقساتتا»، -  دەيدى اۋىل شارۋاشىلىق ۆيتسە-ءمينيسترى ەرلان نىسانبايەۆ.

جاڭا زاڭ جوباسىندا جايىلىمداردى رەتتەۋ ماسەلەسى دە قاراستىرىلعان. شەنەۋنىكتەر 5 جىل سايىن فەرمەردىڭ جۇمىسىنىڭ ناتيجەسىن تەكسەرمەك. ال لاتيفۋنديستەردىڭ مەنشىگىندەگى جەرگە ازىرگە ەشكىم تيىسپەيدى.

ەستەرىڭىزگە سالساق، بىلتىر ۇكىمەت اۋىل شارۋاشىلىعىنا ارنالعان جەرلەردى شەتەلدىكتەرگە ساتپاق بولعان. جەر كودەكسىنە وزگەرىس ەنگىزگەن ەدى. جۇرتتىڭ جاپپاي نارازىلىعىنان كەيىن پارلامەنت ءوزى قابىلداعان قۇجاتتى كەرى قايتارىپ الدى. ال پرەزيدەنت وزگە ەلدىڭ ازاماتتارىنا جەردى جالعا بەرۋ مەن ساتۋعا 2021 -جىلعا دەيىن موراتوري جاريالادى. ءبىراق، شەتەلدىكپەن نەكەگە تۇرعان ەل ازاماتتارى دا جەردى تەگىن پايدالانۋعا قۇقىلى. ولارعا تەك شەكاراعا جاقىن ورنالاسقان ۋچاسكەلەدى بەرۋگە تىيىم سالىنعان. جەر قاتىناستارى تۋرالى جاڭا زاڭ جوباسىن ءماجىلىس جالپى جارتى جىلداي ۋاقىت قارادى. بۇگىن ەكىنشى وقىلىمدا ماقۇلداپ، قۇجاتتى سەناتقا جىبەردى.