ەندى استاناداعى ءاربىر اعاش-كوشەتتىڭ جەكە قۇجاتى بولۋى مۇمكىن
بۇل تۋرالى 21 -اقپان كۇنى بيۋدجەت، ەكونوميكا، ونەركاسىپ جانە كاسىپكەرلىك ماسەلەلەرى بويىنشا قالالىق ءماسليحاتتىڭ تۇراقتى كوميسسياسىندا ەلوردا بويىنشا رەۆيزيالىق كوميسسيانىڭ ءتوراعاسى عالىمجان مولداش ايتتى، دەپ حابارلايدى قازاقپارات ەلوردا ينفو سايتىنا سىلتەمە جاساپ.
«استانا قالاسىندا وتىرعىزىلعان كوشەتتەردىڭ سانى مەن قۇرامى تۋرالى كەشەندى مالىمەتتەر جوق»، - دەدى عالىمجان مولداش.
ونىڭ ايتۋىنشا، ءتيىستى ەسەپتىڭ بولماۋى بيۋدجەت قارجىسىن جانە مەملەكەت اكتيۆىن ءتيىمدى پايدالانۋدا ءوز اسەرىن تيگىزىپ وتىر. ال جەكەلەگەن جاعدايلاردا ولاردىڭ شىعىنىنا الىپ كەلۋدە.
«مىسالعا، الماتى اۋدانىندا قۇزىرلى ورگاننىڭ ءتيىستى رۇقساتىنسىز 3350 اعاش ءسۇرىلدى. بۇل رەتتە، شىعىننىڭ قۇنىنا باعا جۇرگىزۋ مۇمكىن ەمەس. سەبەبى جويىلعان اعاشتار بالانستا جوق»، - دەدى ول.
رەۆيزيالىق كوميسسيا ءتوراعاسىنىڭ سوزىنە سۇيەنسەك، مۇنداي ءتىزىلىم اعاشتار مەن كوشەتتەردى كۇتىپ- باعۋعا جۇمسالاتىن شىعىندى انىقتاۋعا مۇمكىندىك بەرەر ەدى.
«بىلايشا ايتقاندا، بۇل ءاربىر اعاشتىڭ پاسپورتى. وندا ونىڭ ءتۇرى بويىنشا ەرەكشەلىگى، تامىر جۇيەسى، بيىكتىگى جانە تاعى باسقاسى جازىلادى. بۇل عىلىمي قۇجات دەسە بولادى. اعاشقا نومەر مەن شتريح-كود بەرىلەدى. تىزىلىمگە قاراپ، تىڭايتقىشقا، سۋارۋعا، قانداي دا ءبىر رەاگەنتتەرگە جۇمسالاتىن شىعىنداردى ەسەپتەپ شىعارۋعا بولادى. ءتىزىلىم بولسا، بارلىق شىعىنداردى ەسەپتەۋدە اشىقتىق بولار ەدى»، - دەدى عالىمجان مولداش.
ونىڭ اتاپ وتۋىنشە، اعاشتاردىڭ ءتىزىلىمى قازاقستان زاڭناماسىندا جازىپ كورسەتىلگەن. ءبىراق بۇل جۇمىستىڭ اتقارىلۋىنا كىم جاۋاپ بەرۋى تيىستىگى بەلگىسىز.
