تىڭشىلىق تاريحىنا ارنالعان مۇراجاي
مۇنداي مۇراجاي يدەياسىن جۇزەگە اسىرۋ جولىندا دەۆيد ادجايە ەسىمدى بەلگىلى بريتانيالىق ساۋلەتشى جۇمىس ىستەدى. Spyscape 18 مىڭ شارشى مەتردەن استام اۋماقتى قامتيدى. مۇراجاي جالپى سانى 7 كورمە زالىنان تۇرادى. ولاردىڭ ءارقايسىسىندا كەلۋشىلەر باقىلاۋ، شيفرلاۋ، الداۋ، حاكەرلىك جانە بارلاۋ سىندى ءتۇرلى شپيوندىق ادىستەردى ءىس جۇزىندە پايدالۋ مۇمكىندىگىنە يە بولادى. «ءبىز بۇل جوبا ارقىلى ادامدارعا شپيوندىق داعدىلارىندىڭ كۇندەلىكتى ومىرمەن تىعىز بايلانىستى بولۋى مۇمكىن ەكەنىن تۇسىندىرگىمىز كەلدى» ، - دەيدى Spyscape مۇراجايىنىڭ ديرەكتورى شەلبي پريچارد.
مۇراجاي جوباسىمەن جۇمىس ىستەگەن كەزدە، دەۆيد ادجايە بەلگىلى حاكەرلىك توپتاردىڭ بۇرىنعى مۇشەلەرىمەن جانە بارلاۋ اگەنتتىكتەرىنىڭ وكىلدەرىمەن ىنتىماقتاستىق جاساعان. مۇراجايدىڭ ديزاينىندا شىنى، سەمەنت، ارنايى اكۋستيكالىق پانەلدەر جانە تەگىستەلگەن جىلتىراتىلعان بولات سياقتى ءتۇرلى ماتەريالدار پايدالانىلدى. ال، كومەسكى جارىقتاندىرۋ شپيوندىق جۇمباق اتموسفەرا قالىپتاستىرادى.
كەلۋشىلەرگە وزدەرىن تىڭشى رەتىندە سىناپ كورۋگە مۇمكىندىك بەرەتىن مۇراجايدىڭ ينتەراكتيۆتى ەكسكۋرسياسى ۇسىنىلادى. تۋردىڭ سوڭىندا كەلۋشى ءوزىنىڭ تىڭشىلىق قابىلەتىنە انىقتاما الادى جانە وسى ورايدا جەتىلدىرۋ كەرەك تۇستارىنا قاتىستى ۇسىنىستار دا جاسالادى. سونىمەن قاتار، Spyscape مۇراجايىندا كافەمەن قوسا، مىڭداعان سيرەك كەزدەسەتىن تىڭشىلىق كىتاپتار مەن ءتۇرلى تاقىرىپتىق گادجەتتەر ساتاتىن كىتاپ دۇكەنى دە بار. مۇراجايعا كىرۋ تەگىن ەمەس، 39 دوللار تۇرادى.
Massaget.kz
