ەڭبەك ءمينيسترى بيىل قانشا جۇمىس ورنى اشىلاتىنىن ايتتى
ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوشى- قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ، ءبىرىنشى وقىلىمدا ماقۇلداندى.
«ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى، سونداي- اق وزگە دە مەملەكەتتىك- سالالىق باعدارلامالار اياسىندا تەك بيىلدىڭ وزىندە 571 مىڭ جۇمىس ورنىن قۇرۋدى جوسپارلاپ وتىرمىز. بۇل وسى ساناتتا ەڭبەكپەن قامتۋدىڭ مىندەتتى شارالارى. ءبىرىنشى كەزەكتە ءبىز جۇمىسسىزدار نەمەسە ءونىمسىز جۇمىسپەن قامتىلعاندار ءۇشىن جاعداي جاساۋعا كۇش سالدىق»، - دەدى مينيستر ماجىلىستە تىلشىلەردىڭ ساۋالىنا جاۋاپ بەرۋ كەزىندە.
وسى ورايدا ول جۇمىسشىلاردىڭ وتباسىلارىمەن بىرگە كوشىپ- قونۋىنا، باسپانانى جالداۋعا تولەنەتىن سۋبسيديا تۇرىندەگى مەملەكەتتىك قولداۋعا قوسا، تاعى ءبىر كومەكتىڭ جاڭا ءتۇرى قاراستىرىلعانىن جەتكىزدى. بۇل تۇرعىدا جۇمىس بەرۋشىگە سۋبسيديا ۇسىنىلادى.
«ونىڭ كولەمى 1 ميلليون تەڭگە شاماسىندا. ەگەر دە جۇمىس بەرۋشى ەڭبەك كۇشى ارتىق وڭىردەن جۇمىسكەرلەر تاپشى ايماققا اۋىساتىن ادامداردى قىزمەتكە السا، وندا وعان اتالعان سۋبسيديا بەرىلەدى. بۇل تۇرعىدا ول قارجىنى باعدارلاماعا قاتىسقان ادامنىڭ جۇمىسقا ورنالاسۋىنا تولىقتاي جۇمساۋى كەرەك»، - دەدى ۆەدومستۆو باسشىسى.
ونىڭ پايىمىنشا، مەملەكەتتىك باعدارلامالار ەلدەگى بىلىكتى مامانداردى ساقتاپ قالۋعا مۇمكىندىك بەرەتىن بولادى.
«مامانداردىڭ كەتۋدىڭ ءتيىستى دەڭگەيىن بايقاپ وتىرمىز، الايدا جالپى قازاقستاندا كوشى- قوننىڭ وڭتايلى سالدوسى ساقتالۋدا. بۇل قالىپتى پروتسەسس. سوندىقتان ەلىمىزدەگى باعدارلامالار ساپالى جۇمىس ورىندارىن قۇرۋ ءۇشىن جۇزەگە اسىرىلىپ جاتىر»، - دەدى ءابىلقاسىموۆا.
اۆتور: رۋسلان عابباسوۆ
