كەيبىر جىگىتتەر اكە- شەشەسىنىڭ زەينەتاقىسىنا ءومىر ءسۇرىپ ءجۇر - ساپاربايەۆ

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ قازىر جالقاۋلىق بەلەڭ الىپ، ارزان تابىسقا جۇگىرەتىندەردىڭ ارتقانىن ايتتى. جاس جىگىتتەر اكە- شەشەسىنىڭ زەينەتاقىسىنا، ايەلىنىڭ جاردەماقىسىنا كۇن كورۋگە كوشكەن، دەپ حابارلايدى قازاقپارات ءتىلشىسى.

 اقتوبە وبلىسىنىڭ اكىمى بەردىبەك ساپاربايەۆ بۇگىن حالىق الدىندا ەسەپ بەرىپ جاتىر. ءوڭىر باسشىسى 2018 -جىلدى ەكونوميكالىق سەرپىلىس جىلى دەپ جاريالادى.

وتكەن جىلدى قورىتىندىلاپ، وسى جىلدىڭ جوسپارىمەن بولىسكەن ءوڭىر باسشىسى كەيىن تۇرعىنداردىڭ سۇراعىن تىڭداپ، كەيبىرىنە ءوز ويىن ءبىلدىردى. اسىرەسە، جۇمىس ىزدەپ، قىزمەت تاڭدايتىندار ەر ازاماتتاردىڭ ىسىنە رەنىشىن ايتتى. ولارعا مۇگەدەك بولسا دا كاسىپ اشىپ وتىرعان شاحان جولدىبايەۆتى مىسالعا كەلدىردى. جاس جىگىت 100 جاڭا ەسىمنىڭ قاتارىنا قوسىلعان بولاتىن.

سونىمەن قاتار، مۇگەدەكتەردىڭ باسىن قوسىپ، ولاردىڭ پروبلەماسىن بيلىككە جەتكىزىپ وتىرعان قۇرالاي بايمەنوۆاعا راحمەت ايتتى.

«مۇمكىندەگى شەكتەۋلى ازاماتتار ومىرگە تالپىنىپ، جۇمىس ىستەپ جاتقان كەزدە ون ەكى مۇشەسى ساۋ ادام نەگە تاڭەرتەڭنەن كەشكە دەيىن جىلاي بەرەدى. شاحان جولدىبايەۆ رەسپۋبليكاعا تانىمال كاسىپكەر. 100 جاڭا ەسىمنىڭ قاتارىنا ەنىپ، مەملەكەت باسشىسىنىڭ قابىلداۋىندا بولدى. اۋىلعا بارساڭ ەڭگەزەردەي، ون ەكى مۇشەسى ساۋ ازاماتتار جۇمىس جوق دەپ جاتادى. جۇمىس بار، ادامدار ەرىنەدى. مال باعۋعا بولادى. ال ولار «مال باقپايمىن، مۇنايشى بولۋىم كەرەك» دەيدى. اتا- بابامىز بىزگە مۇنايشى بول دەدى مە؟ قازاق 100 جىل بۇرىن مۇنايشى بولعان جوق. قازىرگى زاماندا جالقاۋلىق بەلەڭ الدى. كەيبىر جىگىتتەر اكە- شەشەسىنىڭ زەينەتاقىسىنا، ايەلىنىڭ جاردەماقىسىنا ءومىر ءسۇرىپ ءجۇر. سوعان كەيبىرى ءماز بولادى. اكەم تاعى 10 جىل جۇرسە، ايەلىم كوبىرەك بالا تۋسا دەپ ايتادى. ول نە دەگەن سۇمدىق»، - دەدى بەردىبەك ساپاربايەۆ.

كەيىن ءوڭىر باسشىسى «رۋحاني جاڭعىرۋ» باعدارلاماسى اياسىندا اتقارىلىپ جاتقان جۇمىستارعا توقتالدى. سانانى جاڭعىرتۋ، تاربيەنى كۇشەيتۋ ەكونوميكا، ساياساتتان دا جاۋاپتى جۇمىسقا اينالدى.

«مەملەكەت باسشىسى نۇرسۇلتان نازاربايەۆتىڭ تالابىن جاقسى بىلەسىزدەر. ەگەر ءبىز دامىعان 30 ەلدىڭ قاتارىنا ەنەمىز دەسەك، بارلىق سالادا دامۋ بولۋى كەرەك. وتكەن جىلى «رۋحاني جاڭعىرۋ» باعدارلاماسى جاريالاندى. ەلباسى سانانى دامىتۋ كەرەك دەپ جاتىر. ەكونوميكا، ساياسات جاعىنان جاقسىمىز، ال رۋحاني جاعىنان قالىپ بارا جاتىرمىز. ءداستۇرىمىزدى، سالتىمىزدى ساقتاۋ كەرەك. اعايىن، تاربيە، سانا ادام ءۇشىن ەڭ كەرەك نارسە. سول بولسا ءبىلىم، كاسىپ، دۇنيە بولادى»، - دەدى ءوڭىر باسشىسى بەردىبەك ساپاربايەۆ.

اۆتور: التىناي ساعىندىقوۆا