ەلىمىزدە ەڭ ۇزاق ەسىمىمەن تانىمال اقپانتوقپانتۇرارقوجا سوتتالعالى جاتىر

استانا. قازاقپارات - ەلىمىزدە ەڭ ۇزاق اقپانتوقپانتۇرارقوجا ەسىمىمەن تانىمال ازامات سوتتالىپ جاتىر، دەپ حابارلايدى قازاقپارات.

تۇركىستان قالالىق سوتىنىڭ باسپا ءسوز قىزمەتى حابارلاعانداي، اقپانتوقپانتۇرارقوجاعا قاتىستى قىلمىستىق ءىس سوتقا 12 -اقپان كۇنى تۇسكەن.

«اقپانتوقپانتۇرارقوجا جانىبەكوۆ قىلمىستىق كودەكستىڭ «سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالۋ» جانە «جالعان قۇجاتتاردى، ءمورتابانداردى، مورلەردى، بلانكىلەردى، مەملەكەتتىك پوشتا تولەمى بەلگىلەرىن، مەملەكەتتىك ناگرادالاردى قولدان جاساۋ، دايىنداۋ نەمەسە وتكىزۋ» بويىنشا ايىپتالۋدا. ونىڭ ءىسىن سۋديا ارىسباي تىلەگەنوۆ قاراۋدا. بۇگىن سوتتا العاشقى سوت تىڭداۋى ءوتتى»، دەلىنگەن باسپا ءسوز قىزمەتىنىڭ مالىمەتىندە.

ياعني، ول قالالىق ەمحانانىڭ مەحانيگى قىزمەتىن اتقارىپ ءجۇرىپ، وتكەن جىلدىڭ ماۋسىم ايىندا سەنىپ تاپسىرىلعان مۇلىكتى اسا ءىرى كولەمدە تالان-تاراجعا سالعان دەپ ايىپتالۋدا. ەمحاناعا بولىنگەن 1 ميلليون 200 مىڭ تەڭگەنىڭ جانار-جاعارمايىن ماقساتسىز جۇمساپ جىبەرگەن. ءسويتىپ، قىلمىسىن جاسىرۋ ءۇشىن جالعان قۇجاتتار دايىنداپتى.

ەستەرىڭىزگە سالا كەتەيىك، اقپانتوقپانتۇرارقوجا جانىبەكوۆ 2013 -جىلى ءوزىنىڭ ەڭ ۇزاق ەسىمىمەن تانىمال بولعان ەدى. ونىڭ جەكە كۋالىگىنىڭ سۋرەتى الەۋمەتتىك جەلىلەرگە تاراپ كەتكەنى بەلگىلى.