13:40, 21 - اقپان 2018 | GMT +6
وسكەمەندىكتەر يۋليا گالىشەۆانى قارسى الدى - فوتو
وسكەمەن. قازاقپارات - وسكەمەندىكتەر پحەنچحاندا ءوتىپ جاتقان قىسقى وليمپيادا ويىندارىنىڭ قولا جۇلدەگەرى يۋليا گالىشەۆانى قارسى الدى، دەپ حابارلايدى قازاقپارات.
XXIII قىسقى وليمپيادا ويىندارىنىڭ جۇلدەگەرى يۋليا گالىشەۆا وسكەمەنگە ۇشىپ كەلدى. سپورتشىنى جاقىن تۋىستارىمەن بىرگە جەرلەستەرى قۇشاق جايا قارسى الدى.
«ەلىمىزدىڭ گيمنى شىرقالعاندا جۇرەگىم تۋلاپ كەتتى. جەڭىستىڭ ءدامىن كەشە الماتىعا قونعان كەزدە العاش سەزىندىم. جارىس بويىندا وتانداستارىمنىڭ قولداۋى، تىلەكتەستىگى سەزىلىپ تۇردى. بارشاڭىزعا راحمەت» - دەپ قىسقا قايىردى ول.
پحەنچحان - يۋليا گالىشەۆانىڭ ءۇشىنشى وليمپياداسى. جەڭىپ العان قولا جۇلدەسى ءۇشىن وعان مەملەكەتتەن 75000 دوللار كولەمىندە سىياقى بەرىلەدى.
سپورتشىنى قاۋمالاعان توپ وليمپيادا جۇلدەگەرىمەن سۋرەتكە ءتۇسىپ، قولتاڭبا الۋعا مۇمكىندىك الدى. باپكەرلەرى يۋليا گالىشەۆانى جاپونيادا وتەتىن الەم كۋبوگىنىڭ سايىسى كۇتىپ تۇرعانىن اتادى.
