الماتى اكىمى باۋىرجان بايبەك تەگىن باسپانا تۋرالى سوڭعى شەشىمدى ايتتى

الماتى. قازاقپارات - بۇگىن الماتىدا قالا اكىمى باۋىرجان بايبەك حالىقپەن ەسەپتى كەزدەسۋ بارىسىندا قالا تۇرعىندارىنىڭ باسپانا ماسەلەسى تۋرالى ايتتى، دەپ حابارلايدى قازاقپارات ءتىلشىسى.

قالا باسشىسى بۇرىنعىداي تەگىن باسپانا بەرۋ بولمايتىنىن جەتكىزدى.

«تەگىن باسپانا بولمايدى. ەگەر سىزگە پاتەر كەرەك بولسا، كەزەككە تۇرىڭىز، تومەن جالاقى الاتىنىڭىزدى نەمەسە مۇگەدەكتىگىڭىزدى دالەلدەيتىن قۇجات كورسەتىڭىز. ماسەلەن، «نۇرلى جەر» باعدارلاماسى ارقىلى 15 جىلعا پايىزسىز نەسيەمەن بىلتىر 5 مىڭ وتباسى پاتەر الدى، 175 جەتىمگە پاتەر بەرىلدى»، - دەدى باۋىرجان بايبەك.

سونىمەن قاتار، قالا اكىمى ەسكى ءۇيىنىڭ قۇنىن بۇلداپ، مەملەكەتكە قازىرگى باعاممەن بەرۋگە كەلىسپەي وتىرعان ءۇي يەلەرىن دە تىلگە تيەك ەتتى.

«ءبىر ەسكى ۇيدە 12 وتباسى تۇرسا، ونىڭ 11 ى ءۇيدى بوساتۋعا كەلىسىپ تۇرسا، 1 ادام قارسى بولادى. مەن ول ادامدارعا ايتقىم كەلەدى. بۇرىنعى باعا بولمايدى. ءۇيدىڭ قۇنى تۇسەتىن بولادى. وسىنداي پىكىردەگى ادامداردىڭ كەسىرىنەن تۇگەل ءۇيدىڭ ءسۇرىلۋ پروتسەسى توقتاپ تۇرادى. كەرىسىنشە، اكىمدىك ەسكى ءۇي تۇرعىندارىنىڭ تەزىرەك ءۇي الۋىن قامتاماسىز ەتۋ ءۇشىن قاعاز جۇمىستارىن دا بارىنشا ازايتىپ، ىڭعايلى جاعداي جاساپ وتىر»، - دەدى قالا اكىمى.

ونىڭ ايتۋىنشا، الماتىنىڭ تۇركسىب اۋدانىندا 400 وتباسى كاركاس-قامىستان سوعىلعان ۇيدە تۇرىپ جاتىر.

«ەسكى باسپانا» باعدارلاماسى بويىنشا سوڭعى 5 جىلدا 54 ءۇي پايدالانۋعا بەرىلگەن. 500 دەن استام وتباسى جاڭا ۇيلەرگە كوشتى.