الماتى اكىمى جالقاۋ شەنەۋنىكتەردىڭ ورنىنا بەلسەندى ازاماتتاردى جۇمىسقا الۋدى ۇسىندى

الماتى. قازاقپارات - بۇگىن الماتىدا قالا اكىمى باۋىرجان بايبەك حالىقپەن ەسەپتى كەزدەسۋ بارىسىندا بەلسەندى تۇرعىندارعا العىس ءبىلدىردى، دەپ حابارلايدى قازاقپارات ءتىلشىسى.

ونىڭ ايتۋىنشا، قالا تۇرعىندارى تاراپىنان الەۋمەتتىك جەلىلەر، وپەن الماتى پورتالى، اكىمدىكتەر ارقىلى قالا بيلىگىنە 120 مىڭ رەت ءوتىنىش بىلدىرگەن.

«ينتەرنەت جەلىسى 24 ساعات بويى اشىق بولۋعا مۇمكىندىك بەرەدى. بۇل وتىنىشتەردىڭ بارلىعى اۋدان اكىمدىكتەرىنىڭ جيىندارىندا تالقىلانادى. اسىرەسە، فەيسبۋك جەلىسىندە «جاياۋ جۇرگىنشىلەرگە ارنالعان قالا» توبىندا ازاماتتار بەلسەندى پىكىر بىلدىرەدى. ماسەلەن، يگىلىك قاڭتاربايەۆا، الەكسەي شەگلوۆ، اسقار تولەيەۆتەر زاڭسىز سالىنعان عيماراتتار، اعاشتى زاڭسىز وتاۋ ماسەلەلەرىن، ليۋكتەردىڭ جوقتىعىن حابارلاپ وتىرادى.

دۋمان قاپاسوۆ ەسىمدى ازاماتتىڭ كومەگىمەن برۋسيلوۆسكي كوشەسىندەگى جازعى كافە ءسۇرىلدى. ەلەنا لىسەنكو ەسىمدى تۇرعىننىڭ كومەگىمەن جەراستى جولدارىنداعى جارىقتاندىرۋ قالپىنا كەلتىرىلدى. ساكەن جۇسىپبەكوۆ دەگەن ازامات 30 ماسەلەنىڭ شەشىلۋىنە كومەك بەردى. مۇمكىن كەيبىر جۇمىس جاسامايتىن ورگاندارداعى ادامداردىڭ ورنىنا ساكەن جۇسىپبەكوۆتى جۇمىسقا قابىلدارمىز؟ ونىڭ جۇمىسى ناتيجەلى ەكەنى كورىنىپ تۇر»، - دەدى باۋىرجان بايبەك.

قالا اكىمى الماتىنىڭ ەكونوميكالىق الەۋمەتتىك دامۋ كورسەتكىشتەرىن تىلگە تيەك ەتتى.

ونىڭ ايتۋىنشا، تاۋەلسىزدىك جىلدارىنان بەرى الماتىدا ەكونوميكا 100 ەسە وسكەن. تۇرعىن ءۇي قورى 2 ەسە، جەكە كولىكتەر 10 ەسە ارتقان. قازىر الماتىنىڭ ەكونوميكاسى ەل ەكونوميكاسىنىڭ ¼ بولىگىن قۇرايدى.

ايتا كەتۋ كەرەك، الماتى اكىمىنىڭ ق ر اقپارات جانە كوممۋنيكاتسيالار ءمينيسترى داۋرەن ابايەۆ، ق ر پارلامەنتى سەناتىنىڭ دەپۋتاتى دينار نۇكەتايەۆا، ەتنومادەني بىرلەستىكتەر، «اتامەكەن» پالاتاسىنىڭ، ۇ ە ۇ، ب ا ق وكىلدەرى قاتىسىپ وتىر.