قازاق ۇلتىنا العىس ايتۋ كۇنى بيىل وڭتۇستىك قازاقستاندا ون كۇنگە جالعاسادى
بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق قازاقستان حالقى اسسامبلەياسى ءتوراعاسىنىڭ ورىنباسارى، حاتشىلىق مەڭگەرۋشىسى مۇراتالى قالمۇراتوۆ مالىمدەدى، دەپ حابارلايدى قازاقپارات ءتىلشىسى.
سپيكەردىڭ سوزىنشە، جاڭا سيپاتتا ءارى جاڭا مازمۇندا وتكىزىلەتىن مەرەكەلىك شارالار وڭىردە 20 -اقپاننان باستالىپ، 1 -ناۋرىزعا دەيىن جالعاسادى. ماسەلەن 20 -اقپان - تاريحقا تاعزىم كۇنى بولسا، 21 -اقپان - قايىرىمدىلىق كۇنى رەتىندە وتەدى. ال، 22 -اقپان - شابىت كۇنى، 23 -اقپان - كورشىگە ىزەت كۇنى، 24 -اقپان - تازالىق كۇنى، 25 -اقپان - قۇرمەت كۇنى، 26 -اقپان - ولكە تانۋ كۇنى، 27 -اقپان - كەلىسىم كۇنى، 28 -اقپان - ىقىلاس كۇنى، 1 -ناۋرىز - قازاققا حالقىنا العىس ايتۋ كۇنى بولماق.
«ونكۇندىك ءىس-شارالار كەشە «تاريحقا تاعزىم كۇنىمەن» باستاۋ الدى. وبلىستىق «قازاقستان حالقى اسسامبلەياسى» عيماراتىندا دەپورتاتسيا جىلدارى قازاقستانعا تاعدىر تالكەگىمەن قونىس اۋدارعان ەتنوستاردىڭ وتكەنى مەن بۇگىنى تۋرالى كىتاپتار، فوتو، تاريحي قۇجاتتار مەن جادىگەرلەر قويىلعان ارنايى كورمە ۇيىمداستىرىلدى.
سونداي-اق، «قازاق ەلىنە مىڭ العىس!» مونۋمەنتىنىڭ الدىندا ءتۇرلى ەتنوس وكىلدەرى قيىن-قىستاۋ كەزەڭدە پانا بولعان قازاق جۇرتىنا العىس ايتىپ، وتانشىلدىق تاقىرىپتا ولەڭدەر وقىدى»، - دەدى مۇراتالى قالمۇراتوۆ.
