بەرىك ءابدىعالي ۇلى: بۇل ءالىپبيدى حالىقتىڭ ويى ەسكەرىلگەن نۇسقا دەپ ەسەپتەيمىن

استانا. قازاقپارات - «قاسيەتتى قازاقستان» عىلىمي- زەرتتەۋ ورتالىعىنىڭ باسشىسى، قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا مۇشەسى بەرىك ءابدىعالي ۇلى ءالىپبيدىڭ جاڭا نۇسقاسىنا قاتىستى پىكىرىن ءبىلدىردى،

دەپ حابارلايدى «قازاقپارات» ح ا ا ءتىلشىسى.

«جالپى، ءالىپبيدىڭ ۇلتتىق سانا- سەزىمگە، ۇلتتىق مادەنيەتكە ىقپالى وتە زور. بۇل بۇرىننان بەرى دالەلدەنگەن. سوندىقتان، لاتىن ءالىپبيىنىڭ بۇگىنگى نۇسقاسى حالىقپەن بىرگە اقىلداسىپ، ويىن ەسكەرىپ، قابىلدانىپ جاتقان نۇسقا دەپ ەسەپتەيمىن. سوندىقتان، بۇل قادام ءبىر جاعىنان ساياسي ماڭىزدى دەپ ايتا الامىن»، - دەيدى ول.

بەرىك ءابدىعالي ۇلىنىڭ ايتۋىنشا، تالقىلاۋ باستالعالى بەرى كوپتەگەن ۇسىنىستار قابىلدانعان.

 «سوندىقتان، (بۇل نۇسقانى - اۆت. ) جالپى حالىقتىق دەپ ايتۋعا بولاتىن شىعار. ارينە، كوبىنە ءالى تۇسىنىكسىز بولار. ۋاقىتىنا بايلانىستى ايتار بولسام، ەرەجەسى جاسالعانشا ءالى ءبىرشاما اۋقىمدى جۇمىس بار. قازىرگى جاستارعا، ۇلكەندەرگە مۇنىڭ قاجەتى قانشا دەگەن سۇراق تۋىنداۋى مۇمكىن. كەڭەس كەزىندە ءالىپبي ادەيى كيريللگە اۋىستىرىلعان. وسىنى ەسكەرە وتىرىپ، قازىرگى قادامدى تاريحي شەشىم دەپ قابىلدايمىن»، - دەيدى بەرىك ءابدىعالي ۇلى.

سونىمەن بىرگە، ول قوعامدا ءارتۇرلى پىكىرلەر بولاتىنىن دا ايتىپ ءوتتى.

«البەتتە، مىڭ ادام بولعاننان كەيىن مىڭ ءتۇرلى پىكىر بولادى. ەرەجە قابىلدانادى. ەندىگى قازىرگى ۋاقىتتا ءبىلىم جانە عىلىم مينيسترلىگى، ءتىل ينستيتۋتتارى وسىعان بايلانىستى قازاق تىلىندە جازۋدىڭ ەرەجەلەرىن شىعارۋ كەرەك. ياعني، دىبىستار تولىق زەرتتەلەدى. ونىڭ وزىنە 5 جىلداي ۋاقىت كەتۋى مۇمكىن. سونىڭ بارىسىندا، مەنىڭ ويىمشا، ايتارلىقتاي وزگەرىس بولمايدى»، - دەپ ءتۇيدى بەرىك ءابدىعالي ۇلى.

اۆتور: ايان بەكەن ۇلى