ديماشتىڭ ءىزباسارى استانا وپەرادا ونەر كورسەتەدى
وندا تەاتردىڭ تەنور پارتياسىنداعى ەڭ جاس ءارتىسى - «استانا وپەرا» بالالار ستۋدياسىنىڭ سوليسى قاجىمۇرات ەركىن العاش رەت ساحنا تورىنە شىعادى.
«ون جاسار قاجىمۇرات قويىلىمعا تولىققاندى جەكە نومىرىمەن سوليست رەتىندە قاتىسادى. جاس ءارتىس بۇرىن دج. پۋچچينيدىڭ «توسكا» وپەراسىندا باقتاشى بالا ءرولىن، «بوگەما» وپەراسىندا سولونى ورىنداعان، اعا بۋىن ارىپتەستەرىمەن بىرگە ءتۇرلى كونسەرتتىك باعدارلامالارعا قاتىسقان. قازىردىڭ وزىندە قاجىمۇرات ەركىن جوعارى كاسىبيلىگىن، ارتىستىگىن، ايرىقشا مۋزىكالىق قابىلەتتەرى مەن زور الەۋەتىن كورسەتۋدە»، - دەپ جازدى تەاتردىڭ باسپا ءسوز قىزمەتى.
رەجيسسەر ناتاليا كاگاديدىڭ ايتۋىنشا، قاجىمۇرات ەركىن كۇردەلى ۆوكالدىق پارتيانى كەرەمەت يگەرىپ قانا قويماي، جاڭا ساحنالىق بەينەنى دە الىپ شىعۋى ءتيىس. مۇنداي تاجىريبە ومىردە بۇرىن- سوڭدى بولماعان، ياعني تەنورعا ارناپ جازىلعان ءرولدى بالا داۋسى ورىنداماعان.
ك. ورفتىڭ ەڭ تانىمال شىعارماسى «استانا وپەرا» ساحناسىندا سيمفونيالىق وركەستر، حور، بالالار حورى مەن وپەرا ترۋپپاسى جەتەكشى سوليستەرىنىڭ ورىنداۋىندا شىرقالادى. سوپرانو پارتياسىن باشقۇرتستاننىڭ ەڭبەك سىڭىرگەن ءارتىسى الفيا كاريموۆا، باريتون - حالىقارالىق بايقاۋلاردىڭ لاۋرەاتى تالعات عالەيەۆ ۇسىنادى. ديريجەر - قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ، باس حورمەيستەر - قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ، رەجيسسەر - ناتاليا كاگاديي، بالالار ستۋدياسىنىڭ جەتەكشىسى - التىنعانىم احمەتوۆا.
«بۇل ادەتتەگى سپەكتاكل ەمەس، مۇندا مۋزىكا، ءسوز، بەينەقاتار ءوزارا ۇيلەسىم تاپقان، ساحنانىڭ بىرەگەي تەحنيكالىق مۇمكىندىكتەرى قولدانىلعان. تىڭدارمان قاۋىمعا تاعدىردىڭ تاۋقىمەتى، فورتۋنا دوڭگەلەگىنىڭ ماڭگىلىك قوزعالىسى مەن باستاپقى نۇكتەسىنە قايتا ورالۋى، ادام ءومىرىنىڭ شاراسىزدىق شەڭبەرى تۋرالى وسيەت اڭگىمە ۇسىنىلادى. ايتىلعان وقيعا كورەرمەندەرگە ءومىردىڭ ءمانىن جاڭاشا تۇسىنۋگە شابىتتاندىرادى، - دەپ ءوز ءسوزىن تۇيىندەدى ناتاليا كاگادي.
اۆتور: ايجان سەرىكجان قىزى
