قازاقستاندا ينتەرنەت- دۇكەن اشۋ ءۇشىن نە ىستەۋ كەرەك
بۇگىنگى شارا ەلەكتروندى ساۋدا جۇرگىزۋ ماسەلەسىنە ارنالدى، دەپ حابارلايدى قازاقپارات ءتىلشىسى.
«قازپوشتا» ا ق- نىڭ ەلەكتروندى ساۋدا جونىندەگى اتقارۋشى ديرەكتورى اسقاربەك الشانبايەۆتىڭ ايتۋىنشا، بۇگىندە ينتەرنەت- دۇكەن اشۋ ءۇشىن ناقتى ءۇش ماسەلەنى ەسكەرۋ كەرەك.
«بىرىنشىدەن، پلاتفورما قاجەت. سول پلاتفورمانىڭ نەگىزىندە كەز كەلگەن ادام ءوزىنىڭ ينتەرنەت- دۇكەنىن اشا الادى. ەكىنشىدەن، لوگيستيكا، ياعني ساتىلعان تاۋارلاردى جەتكىزۋ جەلىسى بولۋى شارت. بۇگىندە رەسپۋبليكا بويىنشا 70-تەن استام كۋرەرلىك كومپانيا بار. سونىڭ ىشىندە كەز كەلگەن كومپانيانى جالداپ، كەلىسىمشارتقا وتىرۋعا بولادى. سوندا كۋرەرلەر ينتەرنەت دۇكەننىڭ تاۋارلارىن تۇتىنۋشىعا جەتكىزىپ وتىرادى. ۇشىنشىدەن، تولەم جۇيەسىن ەنگىزۋ كەرەك. ول كارتوچكا بولا ما، پوشتا بولىمشەسىندە تولەنە مە، ناقتى ءبىر تولەم قۇرالىن تاڭداپ، ينتەرنەت- دۇكەنگە ەنگىزۋ قاجەت. وسى ءۇش نەگىزگى مىندەت بار. سوسىن ءتورتىنشىسى، ول - ماركەتينگ. ماسەلەن، الەۋمەتتىك جەلىلەردە ارنايى پاراقشالاردى اشىپ، ونلاين ماركەتينگ جۇرگىزۋگە بولادى»، - دەدى ا. الشانبايەۆ.
ونىڭ ايتۋىنشا، بيىلدان باستاپ سالىق كودەكسىنىڭ ەلەكتروندى ساۋداعا قاتىستى وزگەرىستەرى كۇشىنە ەندى. وعان سايكەس، بارلىق ينتەرنەت دۇكەندەر كورپوراتيۆتى جانە تابىس سالىعىنان 5 جىلعا دەيىن بوساتىلادى. اتالعان جەڭىلدىكتى الۋ ءۇشىن ناقتى ءۇش شارت بار. بىرىنشىدەن، ساۋدا- ساتتىق ونلاين رەجيمدە جۇرگىزىلۋى ءتيىس. ەكىنشىدەن، تاۋاردىڭ اقشاسى ەلەكتروندى جۇيە ارقىلى تولەنۋى شارت. ۇشىنشىدەن، تاۋار كۋرەرلىك كومپانيا ارقىلى تىكەلەي تۇتىنۋشىعا جەتكىزىلۋى كەرەك.
ايتا كەتەيىك، بۇگىنگى سەمينارعا « 1С- بيتريكس قازاقستان» كومپانياسىنىڭ ديرەكتورى سارمانتاي قاسەنوۆ، «InSales»- ءتىڭ قازاقستانداعى ديرەكتورى نيكيتا كراسنوياروۆ، «iLab» كومپانياسىنىڭ جەتەكشىسى ۆلاديمير دەنيسوۆ، «aRex Group» ينۆەستيتسيالىق كومپانياسىنىڭ ماركەتينگ جانە ساتۋ جونىندەگى ديرەكتورى اننا وسيپوۆا شاقىرىلدى. دارىستەردى تىڭداۋعا كەلگەن ادامداردىڭ كوپ بولعانى سونشا، بارلىعى «E-Commerce» ورتالىعىنا سىيماي كەتتى.
اۆتور: ارمان اسقاروۆ
