اتىراۋ جۇرتشىلىعى جازۋشى-دراماتۋرگ راحىمجان وتاربايەۆپەن قوشتاستى
شۇرايلى شىعارمالارى قازاقستان عانا ەمەس، شەت ەلدەرگە دە تانىمال بولعان ەرەكشە دارىن يەسى، ق ر ەڭبەك سىڭىرگەن قايراتكەرى، حالىقارالىق شىڭعىس ايتماتوۆ اتىنداعى اكادەمياسىنىڭ اكادەميگى، «پاراسات» وردەنىنىڭ يەگەرى، اتىراۋ قالاسى مەن قۇرمانعازى اۋدانىنىڭ قۇرمەتتى ازاماتى ر. وتاربايەۆپەن قوشتاسۋ ماحامبەت اتىنداعى اتىراۋ وبلىستىق اكادەميالىق قازاق دراما تەاترىندا ءوتتى.
جازۋشى-دراماتۋرگپەن قوشتاسۋعا استانا مەن الماتىدان، قازاقستان وڭىرلەرىنەن دەلەگاتسيالار، سونداي-اق شەت ەلدەردەن راحىمجان وتاربايەۆتى قۇرمەت تۇتىپ، جاقىن ارالاسقان ازاماتتار كەلدى.
قارالى جيىندا اتىراۋ وبلىسىنىڭ اكىمى نۇرلان نوعايەۆ جازۋشىنىڭ قايتالانباس تۇلعاسىنا توقتالىپ، ونىڭ ەسىمى ەشقاشان ۇمىتىلمايتىنىن جەتكىزدى.
«راحىمجان وتاربايەۆتىڭ قازاسى تۋعان جەرى اتىراۋ ءوڭىرى عانا ەمەس، ونىڭ شىعارمالارىن وقىپ، قويىلىمدارىن كورگەن بارشا قازاق ەلىنىڭ قابىرعاسىن قايىستىرىپ كەتتى. شۇكىرشىلىك ەتەتىنى، سوڭىندا ءىزى دە، ءسوزى دە، كوزى دە قالدى. ەندى ونىڭ اتقارا الماي كەتكەن ىستەرىن اياقتاۋ - كەيىنگى ۇرپاققا پارىز»، - دەدى ءوڭىر باسشىسى.
قارالى جيىندا، سونداي-اق، تەاتر جانە كينو تارلانى، قازاقستاننىڭ ەڭبەك ەرى اسانالى ءاشىموۆ، اقىندار، «قازاق ادەبيەتى» گازەتىنىڭ باس رەداكتورى، قازاقستان جازۋشىلار وداعى باسقارماسى ءتوراعاسىنىڭ ورىنباسارى جاناربەك ءاشىمجان، اقۇشتاپ باقتىگەرەيەۆا جانە باسقالار ازالى ءسوزىن ارنادى.
«سوناۋ عاسىرلارداعى ۇلىلار مەن سال-سەرىلەردىڭ جالعاسىنداي بولعان راحىمجان وتاربايەۆ ءسوزى عانا ەمەس، ءجۇرىس-تۇرىسىنا دەيىن ەشكىمگە ۇقسامايتىن دارا تۇلعا ەدى. كوركەم پروزاسى ءوز الدىنا، بەيبارىس، ماحامبەت، قۇرمانعازى سىندى ۇلىلاردىڭ تەاترداعى بەينەسىن سومداپ كەتتى. بۇل ءبىر ادامعا از دۇنيە ەمەس. ايتماتوۆتىڭ ءوزى جوعارى باعالاعان راحىمجاننىڭ ەكىنشى، ماڭگىلىك ءومىرى ەندى باستالدى» - دەدى اسانالى ءاشىموۆ.
ر. وتاربايەۆتىڭ قازاسىنا وراي جەتكەن جەدەلحاتتار دا وقىلدى.
ءبىر شۇكىرشىلىك ەتەتىن جايت، نەبارى 62 جاسقا قاراعان شاعىندا دۇنيەدەن وزعان جازۋشى-دراماتۋرگتىڭ سوڭىندا مول مۇراسى قالدى. باسقاسىن ايتپاعاندا، ءوزى جازىپ كەتكەنىندەي، 40 باسپا تاباق ورىسشا كىتابى جانە 7 تومدىعى ازىرگە جارىق كورگەن جوق. ەندىگى ماقسات شىعارماشىلىق جولىن ولەڭنەن باستاپ، قازاق ادەبيەتىنىڭ قابىرعالى وكىلدەرىنىڭ بىرىنە اينالعان قالامگەردىڭ ەڭبەكتەرىن جيناستىرىپ، باسپادان شىعارىپ، حالىققا جەتكىزۋ بولسا كەرەك.
ەسكە سالا كەتەيىك، بەلگىلى جازۋشى-دراماتۋرگ راحىمجان وتاربايەۆتىڭ ومىردەن وزعانى تۋرالى بۇدان بۇرىن جازىلعان بولاتىن.
