بيبىگۇل تولەگەنوۆا: ەكىنشى كۇيەۋىم قول كوتەرىپ، قىزىم ەكەۋمىزدى اۋرۋحانادان ءبىر-اق شىعاردى

None
None
استانا. قازاقپارات - بۇگىنگى تاڭدا قازاق ەستراداسىنىڭ پريما- مادونناسىنا اينالعان بيبىگۇل تولەگەنوۆا استانا ارناسىنداعى «سىرلاسۋ» باعدارلاماسىنا بارىپ ءبىراز سىرىن ەل الدىندا اشىپ تاستادى. ايتارى بار ءانشى نە دەگەنىن بىلە وتىرىڭىزدار.

«18 جاسىمدا تۇرمىسقا شىقتىم. الماتىعا بارا سالا 30 عا كەلگەن سەمەيدىڭ ازاماتىنا تۇرمىسقا شىقتىم. ونىڭ ءۇيى جوق، مەن جاتاقحانادا تۇرامىن. قايدا بارامىز؟ وتباسىلى ادامداردى جاتاقحاناعا تۇرعىزبايدى. سونىمەن ءبىر جەكە ۇيگە كىردىك. قار تۇسكەننەن كەيىن وندا تۇرۋعا مۇمكىنشىلىك بولعان جوق. كۇيەۋىم احمەت قۋانىش ۇلىنا بارىپ: «ءبىز مۇندا تۇرا المايمىز، مەن ايەلىمدى الىپ كەتەمىن»، - دەگەندە ول كىسى: «جوق، الىپ كەتە المايسىز. ءبىز قازىر اۋىل ارالاپ، وسىنداي تالانتتاردى ىزدەپ جاتىرمىز. كەلىپ وتىرعان ادامدى جىبەرە المايمىز. وقىتامىز، جاعداي جاسايمىز، سىزگە جۇمىس تابامىز»، - دەدى. ءسويتىپ كۇيەۋىم تەاتر ينستيتۋتىنا زاۆۋچ بولىپ جۇمىسقا كىردى»، - دەپ ەسكە الادى تولەگەنوۆا.

بۇدان كەيىن ءانشى وتباسىمەن بىرگە جاتاقحانادا، ۋچيليشەنىڭ جەرتولەسىندە تۇرعانىن ايتادى.

«تۇرمىستىق ومىردە كورگەن قيىنشىلىقتى قۇداي باسقا بەرمەسىن»، - دەپ باياندادى ول.

ايتۋىنشا، قيىنشىلىققا شىداماعان كۇيەۋى اقىرىندا اراققا سالىنىپ كەتكەن.

«ول كىسى وقىمىستى، ءبىلىمدى بولدى. ال مەن اۋىلدان كەلگەن نە بىلەمىن؟ كىتاپ تا وقىماعانمىن. ءسويتىپ ءجۇرىپ كۇيەۋىم ماسكۇنەم بولىپ كەتتى. مەن وعان ەشتەڭە ايتا المايمىن، قورقامىن، ايتۋعا ۇيالامىن. ىشكەن ادامنىڭ جايى بەلگىلى عوي. مەن تەاترعا جۇمىسقا تۇرعان سوڭ، ول ارتىمنان ىزدەپ كەلىپ، تالاي شۋ شىعارىپ، بەرەكەمدى قاشىردى. سونىمەن بۇل ادام بولمايدى دەپ ەكى بالامدى الىپ، قاشتىم دا كەتتىم»، - دەپ ەسكە الادى بيبىگۇل احمەت قىزى.

ارادا 5-6 جىل وتكەن سوڭ تولەگەنوۆا ۇزىن بويلى، كەلبەتى كەلىسكەن كامەل ەسىمدى جىگىتكە تۇرمىسقا شىققان.

«اكىمشى جىگىت ەدى. قىزداردىڭ بارلىعى دا مىنەزى جاقسى، اراق ىشپەيدى دەپ ماقتايتىن. ءسويتىپ، ءارى بەرى قاراپ ءجۇردىم دە، ەڭبەكقور جىگىت ەكەنىن ءبىلدىم. بوي دەسە بويى، ءتۇر دەسە ءتۇرى بار. ەكەۋمىزدىڭ اڭگىمەمىز جاراسىپ، 1961 -جىلى تۇرمىسقا شىقتىم. اكەسى كەزىندە لەنينمەن كەزدەسكەن، سونداي ءبىلىمدى كىسى ەكەن. مەن ول كەزدە قازاقستاننىڭ حالىق ءارتىسىمىن. ولار ماعان ءارتىس بولعاننان سوڭ ءبىرتۇرلى قاراعان بولۋى كەرەك. 1967 -جىلى ىسساپارمەن ەگيپەتكە باردىم. كەلگەننەن كەيىن مۇحامەدجان قاراتايەۆ دەگەن اكەممەن جاستى اعامنان قىزعانىپ، ماعان قول كوتەردى. ميىم شايقالىپ، اۋرۋحاناعا ءتۇستىم. تەاترداعىلار «تولەگەنوۆانىڭ كۇيەۋى باسىن بالتامەن جارىپتى» دەپ شۋلاستى. مەن وندايدى جەك كورەمىن، ەشقاشان قول تيگىزبەيتىن اداممىن. «سەن سول كىسىمەن ەكى ادام بولىپ ادەيى كەتتىڭ» دەپ جالا جاپتى. بىرەۋلەر ايداپ سالعان بولۋى كەرەك. ويتكەنى وندايى بولمايتىن. قايتا بىرەۋلەر ماعان قاراسا، كۇلىپ وتىراتىن. جالعىز ءوزىمدى عانا ەمەس، قىزىم مەنى جاقتاپ ەدى، ونى دا ۇرىپ تاستادى. ءسويتىپ ەكەۋمىز اۋرۋحانادان ءبىر-اق شىقتى. مەنىڭ ميىم شايقالعان. بالەسىنەن اۋلاق، بالالارىما زاقىم كەلگەنشە، تۇرمايمىن دەپ كەتىپ قالدىم»، -  دەيدى ول.

بيبىگۇل احمەت قىزى جاسى 40-قا جاقىنداعاندا جاس جىگىتكە تۇرمىسقا شىققان. الايدا ول دا جۇبايىنىڭ ۇيدە وتىرعانىن قالاپ، انشىگە كۇن كورسەتپەگەن كورىنەدى.

«قازاقتىڭ جىگىتتەرى ايەلدەرىن وتىرعىزىپ قويىپ، ۇستىنەن قاراپ وتىرعاندى جاقسى كورەدى»، دەيدى احمەت قىزى.

دەرەككوزى: «سىرلاسۋ» باعدارلاماسى

سوڭعى جاڭالىقتار