بەيجىڭدەگى جەمقورلارعا ارنالعان ەليتالىق تۇرمەدە بوس ورىن قالماعان

استانا. قازاقپارات - بەيجىڭدەگى ەليتالىق شينچىن تۇرمەسىندە جەمقورلىق قىلمىسقا قاتىستى سوتتالعان جوعارى شەندى شەنەۋنىكتەر مەن پارتيا قىزمەتكەرلەرىنە ارنالعان ورىندار تاۋسىلعان.

South China Morning Post حابارلاعانداي، تۇرمەنىڭ شەكتەن تىس تولىپ كەتۋى ونداعى سوتتالعانداردىڭ تۋىستارىمەن كەزدەسىپ، وتباسىلىق تۇسكى اس ءىشۋى مۇمكىندىگىنەن ايىرعان. مىسالى، قىتايداعى جاڭا جىل مەرەكەسىنە وراي جاسى 60-تان اسقان سوتتالۋشىلار ءوزىنىڭ بىرنەشە وتباسى مۇشەسىمەن بىرگە مەرەكەلىك تۇسكى اس ىشۋىنە رۇقسات ەتىلەتىن. الايدا، بيىلعى جىلى بۇل ءۇردىستىڭ كۇشى جويىلىپ، جاڭا جىلعا دەيىنگى جانە كەيىنگى ەكى اپتا بويى تۇرمەگە كەلۋشىلەرگە تىيىم سالىنعان.

ەليتالىق تۇرمەدە وتىرعاندار سانى تاعى دا وسەدى دەپ كۇتىلۋدە. قىتايدا تەڭدەسسىز قۇزىرەتتەر بەرىلەتىن ۇلتتىق باقىلاۋ كوميسسياسى قۇرىلاتىن بولادى. «شينحۋا» مەملەكەتتىك اگەنتتىگىنىڭ دەرەكتەرى بويىنشا كوميسسيا مۇشەلەرى تەرگەۋ جۇرگىزۋگە، قاراجاتىنا تىيىم سالۋعا، كاسىپورىندى جابۋعا، ءتىنتۋ جۇرگىزۋگە جانە كۇدىكتىلەردى قاماۋعا الۋعا قۇقىلى بولادى. ەڭ باستىسى، زاڭ قابىلدانعان جاعدايدا مۇنىڭ بارلىعىن سوتقا دەيىن اتقارۋعا بولادى.

قىتايداعى جەمقورلىققا قارسى كۇرەستىڭ بەس جىلى ىشىندە قۇقىق قورعاۋ جانە پارتياىشىلىك باقىلاۋ ورگاندارى رەسمي دەرەكتەر بويىنشا 1,35 ميلليوننان استام شەنەۋنىكتەر مەن پارتيا مۇشەلەرىن ءارتۇرلى جازاعا تارتقان. سونىڭ ىشىندە ءمينيستردىڭ ورىنباسارى جانە ودان جوعارى لاۋازىمداعى 100-گە جۋىق مەملەكەتتىك قىزمەتشى بار. ناق وسى ساناتتاعى شەنەۋنىكتەر ءومىر بويى باس بوستاندىعىنان ايىرىلعان.

 

دەرەككوزى: سەگودنيا