ەربولات قۇدايبەرگەن: ديماش ەركەككە ءتان ەمەس داۋسىمەن ءبىزدى الەمگە تانىتىپ جاتىر

استانا. قازاقپارات - كوپتەن بەرى ەل نازارىنان تاسادا بولعان رەپەر ەربولات قۇدايبەرگەن قازىرگى قازاق ەستراداسىنا قاتىستى پىكىرىن ءبىلدىردى.

ول اتى الەمگە تانىلعان ديماش قۇدايبەرگەننىڭ بەيداستۇرلى داۋىس يەسى ەكەنىن مالىمدەدى. بۇل تۋرالى ول زارينا ءمۇسىلىمنىڭ «سوككەن اڭگىمە» باعدارلاماسىنا بەرگەن سۇحباتىندا ايتتى.

الايدا ەربولات تەگى وزىنىكىمەن بىردەي ديماشتى سىيلايتىنىن اتاپ ءوتتى.

«ديماشتىڭ ورىنداۋ شەبەرلىگى ءداستۇرلى ەمەس، ءبىراق ول ءبىزدى الەمگە تانىتىپ جاتىر. تابيعات بويىنشا ەركەك ادام شيقىلدامايدى. ەركەكتىڭ داۋسى تەنور بولۋ كەرەك. مىسالى، ديماشتىڭ داۋسى سوپرانو. ول تاڭعالارلىق جاعداي. تاريحقا جۇگىنسەك، 2-3 عاسىردا ءبىر تۋاتىن بالالاردا بولاتىن داۋىس»، - دەپ ءتۇسىندىردى ول.

ماقتان تۇتامىن، ءبىراق ونىڭ اندەرىن تىڭداي المايمىن! ەربولاتتىڭ ديماش تۋرالى پىكىرى وسىنداي.

«مەن ونى باۋىرىم دەپ، تەگىمىز ءبىر دەپ قانشا سىيلاعانىممەن، ونىڭ اندەرىن كۇندەلىكتى تىڭداي المايمىن. ديماش تىڭدايتىن ءانشى ەمەس، بايقاۋدىڭ ءانشىسى. شەتەلگە اپارىپ كورسەتەتىن، ماقتان تۇتاتىن انشىلەردىڭ ءبىرى. ءبىراق مەن ديماشتىڭ اندەرىمەن ونى تويعا شاقىرماس ەدىم»، - دەيدى قۇدايبەرگەنوۆ.