ماعجان جۇمابايەۆتىڭ ولەڭدەرى تۇرىك تىلىندە جارىق كوردى

 كاستامونۋ. قازاقپارات - تۇركيانىڭ كاستامونۋ قالاسىندا قازاقتىڭ ۇلى اقىنى، الاش قوزعالىسىنىڭ قايراتكەرى ماعجان جۇمابايەۆتىڭ تۇرىك تىلىنە اۋدارىلعان تۋىندىلارىنىڭ جيناعى تانىستىرىلدى، دەپ حابارلايدى «قازاقپارات» ح ا ا ءتىلشىسى.

تانىستىرىلىم اقىننىڭ 125 جىلدىعىنا ارنالعان سالتاناتتى شارا بارىسىندا ءوتتى.

جيناقتى تۇرىك تىلىنە ايگىلى اقىن ءالي اكباش اۋدارعان. «ماعجاننىڭ ولەڭدەرىنەن رەپرەسسيا جىلدارىنداعى اقىننىڭ ءوز حالقى ءۇشىن الاڭدايتىنى، سەنىمدى بولاشاقتان، جاس بۋىننان ىزدەيتىنى انىق بايقالادى. ول الداعى ۇرپاقتىڭ بولاشاعى تاۋەلسىز ەلدە ءوربيتىنىن جورامالداپ كەتكەن» ، - دەيدى ا. اكباش.

 ماعجان جۇمابايەۆتىڭ قازاق ءتىلى جانە باۋىرلاس تۇركى حالىقتارىنىڭ بىرلىگى تۋرالى ولەڭدەرى دە اۋدارىلعان.

بۇعان دەيىن حابارلاعانىمىزداي، تۇركيادا ازەربايجان سازگەرى قارا قارايەۆتىڭ، قازاق اقىنى ماعجان جۇمابايەۆتىڭ جانە قىرعىز جازۋشىسى شىڭعىس ايتماتوۆتىڭ مەرەيتويلارىن جانە تۇركسوي حالىقارالىق ۇيىمىنىڭ 25 جىلدىعىن اتاپ وتۋگە ارنالعان شارالار سالتاناتتى تۇردە باستاۋ الدى.

15-16- اقپان كۇندەرى انكارا جانە كاستامونۋ قالالارىندا ۇلىلاردى ەسكە الۋعا ارنالعان كونتسەرتتەر مەن جىر كەشتەرى ءوتتى. سالتاناتتى شارانى تۇركسوي باس حاتشىسى دارحان قاسەيىنوۆ، كاستامونۋ قالاسىنىڭ گۋبەرناتورى جانە ءمەرى ياشار كارادەنيز بەن تاحسين باباش اشتى.