تاريحي «توميريس» فيلمىندە باستى ءرولدى سومدايتىن اكتريسا بەلگىلى بولدى - فوتو

استانا. قازاقپارات - قازاقستاندا ءتۇسىرىلىپ جاتقان «توميريس» تاريحي فيلمىندە باس كەيىپكەردى سومدايتىن اكتريسانىڭ ەسىمى انىقتالدى.

بۇل تۋرالى ءتۇسىرىلىپ جاتقان تۋىندىنىڭ رەجيسسەرى اقان ساتايەۆ ءوزىنىڭ ينستاگرامداعى پاراقشاسىندا جازدى، دەپ حابارلايدى «قازاقپارات» ح ا ا ءتىلشىسى.

«دوستار، سىزدەردىڭ نازارلارىڭىزعا ءبىزدىڭ «توميريس» تاريحي فيلمىنىڭ باس كەيىپكەرىن زور قۋانىشپەن تانىستىرا كەتكىمىز كەلەدى. ءالميرا تۇرسىن. 1990 -جىلعى. پسيحولوگ كوۋچ»، - دەپ جازادى رەجيسسەر.

رەجيسسەردىڭ جازۋىنشا، 27 -ناۋرىز كۇنى كاستينگ- ديرەكتور ونىڭ ينستاگرام پاراقشاسىنا حابارلاما قالدىرعان.

«12 -مامىر كۇنى استانادا وتكەن جالپىقازاقستاندىق كاستينگتە ول ىرىكتەۋگە - كاستينگتىڭ ءبىرىنشى تۋرىنا كەلدى. قىركۇيەك ايىندا رەجيسسەرلىك ۆيدەوسىناق ءوتتى - ول 2- تۋر ەدى. ناتيجەسىندە، ۇمىتكەرلەر سالت اتپەن ءجۇرۋ مەن ساحنالىق شايقاستى مەڭگەرۋ كۋرسى ءۇشىن جاتتىعۋ لاگەرىنە جىبەرىلدى. قازان-قاراشا ايلارىندا جاتتىعۋ لاگەرىندە بولدى. ول ءۇشىنشى تۋر بولاتىن»، - دەيدى ول.

حابارلامادا جازىلعانىنداي، جەلتوقسان ايىندا باس پروديۋسسەر ءاليا نازاربايەۆا مەن رەجيسسەر اقان ساتايەۆ ءرولدى بەكىتكەن.

«قازىرگى ۋاقىتتا ءتۇسىرىلىم توبى دەپارتامەنتىنىڭ باسشىلارى مەن تريۋكتاردى ورىنداۋشىلارمەن، اكتەرلىك شەبەرلىك بويىنشا ماماندارمەن جۇمىس جالعاسىن تابۋدا. بۇل ءالميرانىڭ ۇلكەن كينوداعى دەبيۋتى بولماق»، - دەپ جازادى اقان ساتايەۆ.

ەسكە سالا كەتسەك، وتكەن جىلى شاكەن ايمانوۆ اتىنداعى «قازاق فيلم» ا ق «ساتايفيلم» كينوكومپانياسىمەن بىرلەسىپ، «توميريس» اۋقىمدى تاريحي جوباسى بويىنشا جۇمىسقا كىرىسكەن بولاتىن. فيلم ق ر مادەنيەت جانە سپورت مينيسترلىگىنىڭ تاپسىرىسىمەن ءتۇسىرىلىپ جاتىر. باس پروديۋسەرى - ءاليا نازاربايەۆا («اناعا اپارار جول»). فيلمنىڭ قويۋشى رەجيسسەرى - اقان ساتايەۆ («رەكەتير»، «اداسقان»، «ليكۆيداتور»، «جاۋجۇرەك مىڭ بالا»، «اناعا اپارار جول»).