كورەيلەر ەلوردادا جاڭا جىل مەرەكەسىن قالاي اتاپ ءوتتى - فوتو
مەرەكە اتالىپ وتكەن ورتالىق كورەرمەندەرگە لىق تولدى. جالپى، قازاقستاندىقتاردىڭ كورەي مادەنيەتىنە دەگەن قىزىعۋشىلىعى ەرەكشە دەپ اتاپ وتۋگە بولادى. سەبەبى، جۇزدەگەن ادام اتالمىش مەرەكەنى كورۋگە، ءارتۇرلى مادەني ساباقتار مەن باعدارلاماعا قاتىسۋ ءۇشىن كەلگەن.
«سولنال - بۇل كورەيانىڭ ۇلتتىق مەرەكەسى. ول قۋانىش پەن باقىتتىڭ نۇرىن شاشاتىن ناۋرىز مەيرامى ىسپەتتى. ءبىزدىڭ داستۇرلەرىمىز وتە ۇقساس - بابالاردى قۇرمەت تۇتۋ، كوكتەم الدىندا كەشىرىمدى بولۋ سەكىلدى عۇرىپتارىمىز ۇندەس. ءبىز وسى مەرەكەنى وتكىزۋگە ءبىر اي بويى دايىندالدىق. شىنىمىزدى ايتساق، شارامىز ۇلكەن قىزىعۋشىلىق تۋدىرادى دەپ ويلاعان جوق ەدىك»، - دەدى «قازاقپارات» ح ا ا تىلشىسىمەن اڭگىمەلەسكەن ورتالىقتىڭ ديرەكتورى حەران لي.
كورەيدىڭ جاڭاجىلدىق سالت-داستۇرلەرى شىنىمەن دە قىزىقتى. سولنال - اي-كۇن كۇنتىزبەسىنىڭ العاشقى كۇنى، كورەياداعى ماڭىزدى مەرەكەلەردىڭ ءبىرى. ءۇش كۇن بويى تويلانادى: جاڭا جىلدىڭ الدىنداعى كۇن، جاڭا جىل كۇنى مەن كەلەسى كۇن. بۇل وتباسىلىق مەرەكە بولعاندىقتان، كورەياداعى ادامداردىڭ بارلىعى وتباسىنداعى ۇلكەننىڭ ۇيىنە جينالادى. كۇنى بۇگىنگە دەيىن كورەيالىقتار مەرەكە كۇنى وزدەرىنىڭ ءداستۇرلى كوستيۋمى - «حانبوكتى» كيەدى.
مەرەكە بابالارعا قۇرمەت كورسەتۋ - «چحارەمەن» باستالادى. تاڭەرتەڭ وتباسى بەيىتكە نەمەسە ۇيدە مەحراب (التار) ورناتىپ، جاڭا جىلدا بابالارىنان قورعان بولۋدى سۇرايدى. جاڭا جىلدىڭ مىندەتتى عۇرىپتارىنىڭ تاعى ءبىرى - «سەبە». ول ءداستۇر بويىنشا كىشىلەر ۇلكەندەرگە ءيىلىپ، ولاردىڭ باتاسى مەن كەڭەسىن الادى.
سولنالدا ءارتۇرلى ويىندار دا وينالادى: وتباسىلىق «يۋننوري» ۇستەل تەننيسىنىڭ كوركىن قىزدىرىپ، ەر بالالار مەن ولاردىڭ اعالارى نەمەسە اكەلەرى كوككە باتپىراۋىقتار ۇشىرادى. ال قىز بالالار اتكەنشەكتە وتىرىپ، قىزىقتى اكروباتيكالىق نومىرلەر جاسايدى.
كورەيانىڭ استاناداعى مادەني ورتالىعىنا كەلگەن مەيماندار بۇگىن وسى ويىنداردىڭ ءبىرقاتارىن ويناۋعا مۇمكىندىك الدى. استانالىقتار كورەيلەردىڭ ۇلتتىق «حانبوك» كيىمدەرىن كيىپ كورىپ، «سەبە» ەكسپرەسس- كۋرسىنان ءوتتى. كورەيدىڭ ءدامدى تاعامدارىن ازىرلەپ، ۇلتتىق جاڭاجىلدىق «توككۋك» سورپاسىنان ءدام تاتتى.
اۆتور: ايان بەكەن ۇلى
