نازاربايەۆ: شيڭداۋدا «شاڭحاي سەگىزدىگى» بولىپ كەزدەسەتىنىمىزدى ەرەكشە اتاپ وتكىم كەلەدى
«شاڭحاي ىنتىماقتاستىعى ۇيىمى قازىرگى تاڭدا بۇكىل الەم مويىندايتىن ەڭ ماڭىزدى ۇجىمدىق ورگانداردىڭ ءبىرى بولىپ تابىلادى. ول ورتاق شەكاراسى بار مەملەكەتتەرمەن قۇرىلعان. ءبىز وسى شەكارالاردىڭ سيپاتى ماسەلەسىن شەشكەن بولاتىنبىز. ەستەرىڭىزدە بولسا، كەڭەس وداعى مەن قىتاي كەزىندە كەيبىر ورتاق شەكارالار بەلگىلەنىپ، جازىلماعان بولاتىن. كەيبىر جەرلەر تۋرالى كەلىسىم جوق ەدى. وسى سەبەپتى، ول جەرلەردە مەملەكەتتەر اراسىندا دا قاقتىعىستار تۋىنداعان. سوندىقتان، ورتاق شەكاراسى بار التى مەملەكەت بولىپ، شەكارانى حاتتاپ، قول قويىپ، بۇل دوستىق شەكاراسى ەكەنىن ايتتىق»، - دەدى نۇرسۇلتان نازاربايەۆ.
پرەزيدەنت شەكارالار بەلگىلەنگەننەن كەيىن «ءارى قاراي نە بولادى؟» دەگەن سۇراق كوتەرىلگەنىن ەسكە الدى.
«ءارى قاراي وسى كەزدەسۋلەردى وتكىزەلىك دەپ شەشتىك تە، وسىدان شانحاي ىنتىماقتاستىق ۇيىمى قۇرىلدى»، - دەيدى مەملەكەت باسشىسى
پرەزيدەنت ءوز سوزىندە ۇيىمدى قۇرۋدا باستاما تانىتقانداردىڭ ءبىرى قازاقستان بولعانىن اتاپ ءوتتى.
«سوندىقتان، مەن قازىرگى ۋاقىتتا ساياسي عانا ەمەس، ەكونوميكالىق بىرلەستىككە اينالىپ كەلە جاتقان ش ى ۇ- نى وتە بەلسەندى تۇردە قولدايمىن. ءبىز بىرلەسىپ ەلدەردىڭ ەكونوميكاسىن دامىتۋدامىز. بۇگىنگى تاڭدا ۇلى جىبەك جولىنا 65 كە جۋىق مەملەكەت اتسالىسىپ جاتىر. ول جاققا 600 ميلليارد ا ق ش دوللارداي اقشا باعىتتالۋدا. 100 ميلليارد ا ق ش دوللارلىق قاراجاتى بار ازيا ينفراقۇرىلىمدى دامىتۋ بانكى قۇرىلدى. بۇنىڭ ءبارى دە بارلىق مەملەكەتتەردىڭ قامى ءۇشىن جۇمىس جۇرگىزەدى. وسى شارۋالاردىڭ بارلىعى ش ى ۇ اياسىندا جۇزەگە اسىرىلىپ جاتىر» ، - دەيدى ول.
نۇرسۇلتان نازاربايەۆ سونىمەن قاتار، ەڭ ماڭىزدى ولشەم - «ءۇش زۇلىمدىقپەن» (تەرروريزم، ەكسترەميزم، سەپاراتيزم - اۆت. ) كۇرەس ەكەنىن ايتتى.
«ءبىزدىڭ ارنايى قىزمەتتەر، قۇقىق قورعاۋ ورگاندارى ءبىر- بىرىمەن وتە تىعىز سەرىكتەسە جۇمىس جۇرگىزۋ ۇستىندە. بىزدە تەرروريزممەن كۇرەسۋگە باعىتتالعان ارنايى ۇيىم بار. كەلەسى سۇراق ول - ەسىرتكىمەن كۇرەس. مۇنىڭ ءبارى وسىلارعا جول بەرمەۋ ءۇشىن جاسالۋدا. وسى شارۋالاردىڭ بارلىعىندا ش ى ۇ- نىڭ ءرولى وتە زور»، - دەيدى مەملەكەت باسشىسى.
پرەزيدەنتتىڭ سوزىنە سايكەس، الداعى ۋاقىتتا ۇيىم جۇمىسىنىڭ جوسپارلارى بەكىتىلمەك.
«مەن ەندىگى كەزەكتە شيڭداۋدا «شاڭحاي سەگىزدىگى» بولىپ كەزدەسەتىنىمىزدى ەرەكشە اتاپ وتكىم كەلەدى. ويتكەنى، استانادا ءبىزدىڭ توراعالىمىزبەن ۇيىمىمىزعا ءۇندىستان مەن پاكىستاندى قابىلداۋ جۇرگىزىلگەن بولاتىن. ەندى بۇگىنگى كۇنى 8 مەملەكەت ۇيىم جۇمىسىنا اتسالىسۋدا. قىتاي حالىق رەسپۋبليكاسىنىڭ توراعالىعىمەن شي جينپين مىرزامەن دايىندالۋدامىز. قازاقستان كومەگىن كورسەتىپ كەلەدى. بۇعان دەيىنگىدەي وتە تابىستى كەزدەسۋ بولادى. ءبىز ۇيىمنىڭ الداعى جاڭا جوسپارلارىن بەلگىلەيمىز»، - دەپ ءتۇيدى نۇرسۇلتان نازاربايەۆ.
ايتا كەتسەك، قىتايدىڭ شيڭداۋ قالاسىندا ماۋسىم ايىندا شانحاي ىنتىماقتاستىعى ۇيىمى باسشىلارىنىڭ ءسامميتى وتەدى.
ايان بەكەن ۇلى
