كوشەدە دارەت سىندىرعان مينيستر كوپشىلىكتىڭ كوزىنە ءتۇسىپ قالدى

استانا. قازاقپارات - ءۇندىستاننىڭ رادجاستحان شتاتىندا جەرگىلىكتى دەنساۋلىق ساقتاۋ ءمينيسترى جول بويىندا تۇرىپ دارەت سىندىرعان ساتتە كوپشىلىكتىڭ كوزىنە ءتۇسىپ قالدى، - دەپ حابارلايدى ك ت ك تەلەارناسى.

جول بويىنداعى قابىرعاعا كىشى دارەتىن سىندىرىپ تۇرعان كالي چاران سارافتى دجايپۋر قالاسىنىڭ تۇرعىندارى بىردەن تانىپ، ونى ۇيالى تەلەفوننىڭ بەينەكامەراسىمەن فوتوعا ءتۇسىرىپ العان.

اتالعان ءمينيستردىڭ «بحاراتيا دجاناتا پارتي» دەپ اتالاتىن بيلىك پارتياسىنا مۇشە ەكەنى بەلگىلى. ونىڭ انايى فوتوسۋرەتىن وپپوزيتسيالىق پارتيا وكىلى ءوزىنىڭ Twitter- پاراقشاسىنا جاريالادى.

ساراف ءوزىنىڭ بۇل ارەكەتىنە قاتىستى ناقتى تۇسىندىرمە بەرمەدى. تەك «شاراسىزدىقتان بولدى» دەپ ءبىر اۋىز پىكىرىن بىلدىرگەن. الايدا، جەرگىلىكتى تۇرعىندار بولسا ءمينيستردىڭ بۇل ارەكەتىنە جاپپاي نارازىلىقتارىن بىلدىرۋدە.

«ەگەر ول نيۋ-يوركتە جۇرسە كوشەگە دارەت سىندىرماس ەدى»، - دەپ جازدى دجايپۋر تۇرعىندارى الەۋمەتتىك جەلىلەردە.

ايتا كەتەيىك، ءۇندىستان پرەمەرى نارەندرا مودي 2014 -جىلى بيلىككە كەلىسىمەن «تازا ءۇندىستان» دەگەن باعدارلاما قابىلداعان بولاتىن.

ول ۇندىلەردىڭ كوشەدە وتىرىپ ۇلكەن-كىشى دارەت سىندىرۋىنا قارسى باعىتتالعان. اتالعان باعدارلامادا 2019 -جىلعا دەيىن ءاربىر ءۇندى ازاماتى تازا اۋىزسۋعا جانە جەكە دارەتحاناعا قول جەتكىزۋى ءتيىس دەگەن تاپسىرما بار.

سول ۋاقىتتان بەرى ءۇندىستاندا 60 ميلليون دارەتحانا سالىندى. الايدا، ءالى 500 ميلليون تۇرعىن الىگە دەيىن كوشەگە دارەت سىندىرىپ ءجۇر.