كوكتوبەدە فوتوگرافتان اقشا سۇراعان كۇزەتشىلەر جازالاندى
«VisitAlmaty» ورتالىعى تۋريستەردى اقپاراتتاندىرۋ جانە ءتۋريزمدى دامىتۋ ءۇشىن قۇرىلعان. قالامىزداعى كوپتەگەن تۋريستىك نىسانداردى ساياحاتشىلارعا كوممەرتسيالىق ماقساتتا بولماسا، سۋرەتكە تەگىن تۇسىرۋگە رۇقسات ەتىلگەن. ءبىز قوناق كۇتۋ، مادەنيەت، ونەر سالاسىنا ماماندانعان كومپانيالارعا كەلۋشىلەردىڭ فوتوعا تۇسىرۋىنە جاعداي جاساۋ تۋرالى كەڭەستەر بەرىپ تۇرامىز. ال كوكتوبەدەگى جاعداي جەكەلەي ادامداردىڭ ماسەلەسى، ءبىز ول جاعداي تۋرالى ەستىدىك، كىنالى ادامدار جازاعا تارتىلدى. ەگەر فوتوعا ءتۇسىرۋ ءۇشىن اقشا تالاپ ەتكەن وقيعانىڭ كۋاسى بولساڭىز، «Visit Almaty» اقپارات ورتالىعىنا حابارلاسۋدى سۇرايمىز. ءبىز ول ماسەلەنى قاراستىراتىن بولامىز»، - دەدى اتالعان اقپارات ورتالىعىنىڭ ديرەكتورى كاميلا لۇقپانوۆا.
ەسكە سالا كەتەيىك، بۇگىن تاڭەرتەڭ الماتىلىق فوتوسۋرەتشى ماكسيم زولوتۋحين Facebook-تەگى جەكە پاراقشاسىندا كوكتوبەدە باسىنان وتكەن جاعدايدى جازعان بولاتىن. وندا فوتوگراف كوكتوبە باسىنا شىعىپ، سۋرەتكە تۇسىرە الماعانىن، كۇزەتشىلەردىڭ ودان اقشا سۇراعانىن اشىنا جازعان. كۇزەتشىلەر سۋرەتكە تۇسىرۋگە تىيىم سالىنعانىن ايتىپ، بۇدان بىلاي سۋرەتكە ءتۇسىرۋ اقىسى 35000 تەڭگە بولعانىن جەتكىزگەن. وسى وقيعانى فوتوسۋرەتشى الەۋمەتتىك جەلىدە جاريالاعاننان كەيىن، كوكتوبە پاركىنىڭ اكىمشىلىگى ودان كەشىرىم سۇرادى.
