قازاقتىڭ تاريحي تۇلعالارىمەن بايلانىستى شەتەلدەگى كيەلى جەرلەردى زەرتتەۋ جالعاسادى
بۇل تۋرالى بۇگىن اقوردادا وتكەن ق ر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسىندا مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات.
«بۇگىندە قازاقستاننىڭ كيەلى جەرلەرىنىڭ گەوگرافياسى جوباسى بويىنشا 2018 -جىلعا جوسپار ازىرلەندى. ولاردىڭ قاتارىندا مىناداي ءىس- شارالار ەنگىزىلىپ وتىر: كىتاپتار، فوتوالبومدار، ەنتسيكلوپەديالار، سونىڭ ىشىندە «كيەلى قازاقستان» ەنتسيكلوپەدياسىنىڭ 2- تومىن شىعارۋ؛ وڭىرلەرگە ەتنومادەني ەكسپەديتسيالاردى جالعاستىرۋ؛ قازاقستاننىڭ مادەني جانە تۋريستىك تارتىمدىلىعى تۋرالى الەۋمەتتىك جەلىلەر ءۇشىن موبيلدى فورماتتاعى بەينەروليكتەردى ءۇش تىلدە ءتۇسىرۋدى جالعاستىرۋ؛ كيەلى جەرلەردى كەڭىنەن ناسيحاتتاۋ، سونداي- اق جاڭا ەتنوگرافيالىق جوبالاردى جۇزەگە اسىرۋ، جاڭا تۋريستىك باعىتتاردى اشۋ ماقساتىنداعى وڭىرلەردەگى جۇمىستاردى ۇيلەستىرۋ»، - دەدى مينيستر.
سونىمەن قاتار ول شەتەلدەردە قازاق حالقىنىڭ بەلگىلى تاريحي تۇلعالارىمەن بايلانىستى كيەلى جەرلەردى زەرتتەۋ جۇمىستارى قولعا الىنعانىن ايتتى.
«مىسالى، وزدەرىڭىز بىلەسىزدەر وزبەكستاندا تولە بي، ايتەكە بي، استراحاندا قۇرمانعازىنىڭ جاتقان جەرلەرى بار. سونداي جەرلەردى تانىستىرۋدى جالعاستىرۋىمىز كەرەك. جالپى العاندا ەلباسىنىڭ باعدارلامالىق ماقالاسىنىڭ ارقاسىندا قازاقستاندا كيەلى جەرلەردى زەرتتەۋ جاڭا ساپاعا كوتەرىلدى. كيەلى جەرلەر تۋرالى كىتاپتار شىعارىلىپ، فيلمدەر تۇسىرىلۋدە. ۆيرتۋالدى جانە ينتەراكتيۆتى كارتالار جاسالىپ، بەينەروليكتەر ءتۇسىرۋ سياقتى جۇمىستار جالعاسۋدا»، - دەدى ارىستانبەك مۇحامەدي ۇلى.
وسى رەتتە ق ر پرەزيدەنتى اكىمشىلىگىنىڭ باسشىسى، قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ ءتوراعاسى ادىلبەك جاقسىبەكوۆ وڭىرلىك ءتۋريزمدى دامىتۋ ماقساتىندا وبلىستارعا «قازاقستاننىڭ قاسيەتتى جەرلەرى» جوباسىنىڭ بارلىق نىساندارىن قاجەتتى ينفراقۇرىلىمدارمەن قامتاماسىز ەتۋدى تاپسىردى.
اۆتور: مارلان جيەمباي
