شىعىس قازاقستاندا تۋريستەرگە تارتىمدى قاينار- كولدەردىڭ شيپالىق قاسيەتىنە عىلىمي زەرتتەۋ جاسالۋدا
د. سەرىكبايەۆ اتىنداعى ش ق م ت ۋ عالىمدارى مەن تۋريزم ماماندارى وڭىردەگى 8 كول مەن 2 باستاۋدىڭ سۋىن زەرتتەدى. زەرتتەۋ جۇمىستارى الاكول، مارقاكول، زايسان، سىبە، دۋبىعالى، شىبىندىكول، راحمان قاينارى، قوڭىر اۋليە جانە اۋليەبۇلاق سىندى تانىمال كوزدەردە ءجۇردى. وبلىستىق تۋريستىك- اقپاراتتىق ورتالىقتىڭ ديرەكتورى سىمبات رامازانوۆ اتالمىش زەرتتەۋلەردىڭ قورىتىندىسى الداعى اپتادا بەلگىلى بولاتىنىن ايتادى.
«بىزدەگى تۋريستىك نىسانعا اينالىپ كەتكەن وزەن- كولدەردىڭ شيپالى ەكەندىگىن دالەلدەيتىن ەشقانداي رەتسەنزيالىق قۇجات جوق. ءبىراق بۇل اتالمىش ورىندارعا ەل بىلمەستىكپەن بارىپ ءجۇر دەگەن ءسوز ەمەس. شەتەلدىڭ تۋريستىك كومپانيالارىن قىزىقتىرۋ ءۇشىن وسى قۇجاتتاردى رەتتەۋدىڭ ماڭىزى زور. سۋدىڭ قۇرامىنداعى يوندىق تۇزداردىڭ، رودوننىڭ مولشەرىن انىقتاۋ قاجەت. سوعان قاراپ سۋمەن ەمدەلۋ شارالارىنىڭ ۋاقىتىن بەلگىلەۋگە بولادى» - دەيدى ورتالىق ديرەكتورى سىمبات رامازانوۆ.
ەلىمىزدە مۇنداي زەرتتەۋمەن اينالىساتىن ارنايى مەكەمە جوق ەكەن. سوندىقتان باستاماشى توپ رەسەيدىڭ كۋرورتولوگيا جانە فيزيوتەراپيا بويىنشا عىلىمي- زەرتتەۋ ينستيتۋتىنا جۇگىنىپتى. وسى زەرتتەۋلەردىڭ ەڭ ۇلكەن جەمىسى شوشقالى كول بولىپ وتىر. بەسقاراعاي اۋدانىنىڭ ورتالىعىنان 85 شاقىرىمدا جاتقان كولدىڭ قىستا نەگە قاتپايتىنىن ماماندار تۇزدىڭ كوپتىگىمەن ءتۇسىندىرىپ كەلگەن. رەسەيلىك ماماندار ونىڭ سۋىن تەرى اۋرۋلارىنا بۇلاۋ رەتىندە پايدالانۋ ءتيىمدى ەكەنىن انىقتادى.
«شوشقالىنىڭ سۋىنداعى يوندى تۇزدار جۇيكە جۇيەسى، قان اينالىمى، اس قورىتۋ، نەسەپ جۇيەسى ارۋلارىنا دا تاپتىرماس ءدارۋ ەكەنى دالەلدەندى» - دەيدى سىمبات رامازانوۆ.
اتالمىش باعىتتاعى جۇمىستار جاز شىعا جالعاسىپ، تاعى 4 كولدىڭ سۋى مەن بالشىعىنا بانەلوگيالىق زەرتتەۋ جۇرگىزىلمەك. نىسانادا اراسان، موناستىر، جالاڭاشكول جانە جازابا كولدەرى تۇر.
اۆتور: ەسىمجان ناقتىباي
