موڭعولياداعى قانداستار تۋرالى فيلمنىڭ تۇساۋكەسەرى ءوتتى - «قيىرداعى قازاقتار» دەرەكتى فيلمى

استانا. قازاقپارات - استانادا موڭعوليا قازاقتارىنىڭ تاريحى مەن بۇگىنىن باياندايتىن «قيىرداعى قازاقتار» دەرەكتى فيلمىنىڭ تۇساۋكەسەرى ءوتتى، دەپ حابارلايدى «قازاقپارات» ح ا ا ءتىلشىسى.

اتالعان جوبانى 2017 - جىلدىڭ ماۋسىم ايىنان باستاپ  «Нational digital history» پورتالىنىڭ بازاسىندا ق ر اقپارات جانە كوممۋنيكاتسيالار مينيسترلىگى جۇزەگە اسىردى. دەرەكتى فيلم ۇلتتىق سانا مەن ءتول تاريحتى جاڭعىرتۋ، الىس- جاقىن شەتەلدەردە تۇرىپ جاتقان قازاقتاردىڭ شىنايى ءومىرىن كورسەتۋ ماقساتىندا تۇسىرىلگەن. فيلمنىڭ دەمەۋشىسى - ورالبەك بوتباي.

ءتۇسىرىلىم توبى وتە اۋقىمدى جۇمىستاردى اتقارعان. رەسەيدىڭ استراحان، موڭعوليانىڭ ۇلانباتىر قالاسىن، وزبەكستان استاناسى تاشكەنتتەگى كەنيمەح اۋدانىنا دەيىنگى جانە تاجىكستاننىڭ حۋدجاند قالاسىنا دەيىنگى جەردى، باس اياعى ون مىڭداعان شاقىرىم جولدى باسىپ وتكەن. عاجايىپ تاريحي ورىنداردى كوزىمەن كورىپ، ەرەكشە تاعدىر يەلەرىن تاسپاعا تۇسىرگەن.

استانادا تۇساۋكەسەرى وتكەن «قيىرداعى قازاقتار» دەرەكتى فيلمدەر توپتاماسىنىڭ موڭعوليا قازاقتارىنا ارنالعان ءبولىمى كوپتىڭ كوڭىلىنەن شىقتى. تۋىندىدا ۇلانباتىر قالاسى مەن وعان جاقىن ورنالاسقان نالايحان اۋدانىندا عۇمىر كەشىپ جاتقان ەتنيكالىق قازاقتاردىڭ بۇگىنگى تىرشىلىگى كورسەتىلەدى.

«بۇل - ەلباسىنىڭ «رۋحاني جاڭعىرۋ» باعدارلامالىق ماقالاسىن جۇزەگە اسىرۋ ماقساتىندا قولعا الىنعان جوبا. ەڭ باستىسى، بۇل جوبانى تەك قانا باستاما دەپ ەسەپتەيمىز. شەتەلدە 5 ميلليونعا جۋىق قازاقتىڭ تۇرىپ جاتقانى بىزگە بەلگىلى. سوندىقتان، ولارعا ءبىز ەرەكشە نازارمەن قارايمىز. ەكىنشى جاعىنان ەلباسى ايتقانداي، ولارعا قازاقستاننىڭ ءارقاشان ەسىگى اشىق. 25 جىلدىڭ ىشىندە 1 ميلليونعا جۋىق قانداستارىمىز ەلگە كەلدى. دەرەكتى فيلمدى دەمەۋشىلىك ەتكەن ورالبەك بوتباي مىرزاعا، «قازكونتەنت» باسقارماسىنىڭ ءتوراعاسى ەۆگەني كوچەتوۆ مىرزاعا زور العىسىمدى ايتقىم كەلەدى. قانى قازاق بولماسا دا، زاتى قازاق (كوچەتوۆ تۋرالى - اۆت. ). وسىنداي جوبانى ءوزى (ەۆگەنيي كوچەتوۆ - اۆت. ) ۇسىندى» ، - دەدى فيلمنىڭ تۇساۋكەسەرىندە ق ر اقپارات جانە كوممۋنيكاتسيالار ءمينيسترى داۋرەن ابايەۆ.

ماڭىزدى ءىس- شارا قانداستاردىڭ تاريحي وتانىنان بەيىمدەلۋ ماسەلەرىنە تاعى ءبىر نازار اۋدارۋعا جانە تاريحي وتانىنان تىس ءومىر ءسۇرىپ جاتقان ەتنيكالىق قازاقتاردىڭ ماسەلەلەرىن كوتەرۋگە جول اشادى.

دەرەكتى فيلم جۋىق ارادا  «Нational digital history»  پورتالىندا جاريالانادى.

اۆتور: ايان بەكەن ۇلى