جەيەنبەكوۆ: قازاقستان مەن قىرعىزستان - قۇستىڭ قوس قاناتىنداي

استانا. قازاقپارات - قىرعىزستان پرەزيدەنتى سوورونباي جەيەنبەكوۆ شەكاراشىلاردى مەملەكەتتىك شەكارادان وتەتىندەرگە جىلى شىراي تانىتۋعا شاقىردى، دەپ حابارلادى ازاتتىقتىڭ قىرعىز رەداكسياسى.

 قىرعىزستان پرەزيدەنتى اپپاراتىنىڭ حابارلاۋىنشا، جەيەنبەكوۆ بۇل جايىندا قىرعىزستاننىڭ قازاقستانمەن شەكاراسىنداعى قايتا جابدىقتالعان «چالدىبار - اۆتودوروجنىي» وتكىزۋ بەكەتىنە بارعان كەزىندە ايتتى.

جەيەنبەكوۆ قىرعىزستان مەن قازاقستان حالقى «باۋىرلاس حالىق جانە قۇستىڭ قوس قاناتىنداي» ەكەنىن مالىمدەدى.

«چالدىبار - اۆتودوروجنىي» تەكسەرۋ جانە وتكىزۋ بەكەتى ەكى ەلدىڭ قاقپاسى، بۇل جەردە ورتاق ەسىك اشىلادى، وسى جەردەن ەكى حالىقتىڭ دوستىعى باستالادى. ەجەلدە وسى جەردەن ۇلى جىبەك جولىنىڭ كەرۋەندەرى وتكەن» دەدى جەيەنبەكوۆ.

ول ەلگە كەلەتىن قوناقتاردا قىرعىزستان تۋرالى العاشقى اسەر تەكسەرۋ جانە وتكىزۋ بەكەتتەرىندە پايدا بولاتىنىن جانە مەملەكەتتىڭ يميدجى وسىعان بايلانىستى قالىپتاساتىنىن ايتتى. «چالدىبار - اۆتودوروجنىي» بەكەتىنەن بۇرىن كۇنىنە مىڭنان استام عانا ادام وتسە، جاڭارتىلعاننان كەيىن كۇنىنە جەتى مىڭ دەيىن ادامعا وتە الادى. بەكەتتەن كۇنىنە 350-گە دەيىن كولىك، ونىڭ ىشىندە 70 جۇك كولىگى وتەدى.

شەكارادا جەيەنبەكوۆكە ءبىر ادامدى تەكسەرۋگە ورتا ەسەپپەن 40 سەكۋند، جۇك كولىگىن تەكسەرۋگە 10 مينۋتقا دەيىن ۋاقىت كەتەتىنىن ايتتى.

2017 -جىلى جەلتوقساندا سوورونباي جەيەنبەكوۆ قازاقستانعا ساپارىندا قازاقستان- قىرعىزستان قارىم- قاتىناسى «ستراتەگيالىق سەرىكتەستىك جانە وداقتاستىق باعىتىندا» داميتىنىن مالىمدەگەن. جەەنبەكوۆكە دەيىنگى پرەزيدەنت المازبەك اتامبايەۆ بيلىكتەن كەتەتىن تۇستا ەكى ەل شەكاراسىنداعى جاعداي شيەلەنىسىپ كەتكەن ەدى. ساراپشىلار مۇنى المازبەك اتامبايەۆتىڭ سول كەزدە قازاقستان بيلىگىنە قاراتا ايتقان سىنىمەن بايلانىستىرعان.

www.azattyq.org