20:40, 14 - اقپان 2018 | GMT +5
ءومىرزاق شوكەيەۆ: ءوندىرىستى ارتتىرماساق، كورشى ەلدەردىڭ قانتىنا كومىلىپ قالامىز
استانا. قازاقپارات - ۆيتسە- پرەمەر - ق ر اۋىل شارۋاشىلىعى ءمينيسترى ءومىرزاق شوكەيەۆ قازاقستانعا جەتكىزىلەتىن قانت تاسىمالىنا بەرىلەتىن جەڭىلدىك اتالعان سالانىڭ دامۋىنا كەدەرگى كەلتىرىپ وتىرعانىن اتاپ ءوتتى،
دەپ حابارلايدى «قازاقپارات» ح ا ا ءتىلشىسى.
«2009 -جىلى كەدەن وداعى قۇرىلا باستاعان كەزدە ءبىزدىڭ ەلگە جەتكىزىلەتىن قانت ءۇشىن جەڭىلدىك ەنگىزگەن بولاتىنبىز. بۇل جەڭىلدىك جۇمىس ىستەپ تۇرعانىمەن، بىزدە قانت ءوندىرىسى جۇمىس ىستەمەي قالدى. تۇسىنەسىزدەر مە؟»، - دەيدى ءومىرزاق شوكەيەۆ ۆەدومستۆونىڭ كەڭەيتىلگەن القا وتىرىسىندا.
ا ش م باسشىسىنىڭ ايتۋىنشا، قازاقستانعا كورشىلەس مەملەكەتتەر قانت ءوندىرىسىن ايتارلىقتاي ارتتىرا باستاعان.
«وسى ۋاقىت ارالىعىندا رەسەي مەن بەلارۋس قانت ءوندىرىسىن ەكى ەسەگە ارتتىردى. ەگەر ءبىز بۇل جەڭىلدىكتى الىپ تاستاماساق، ءبىز قانت ءوندىرىسىن مۇلدە جوعالتىپ الامىز. ءبىزدىڭ ارىپتەستەرىمىزدىڭ ءوزى ءبىزدى قانتتارىمەن كومىپ تاستايدى»، - دەيدى ءومىرزاق شوكەيەۆ.
اۆتور: ايان بەكەن ۇلى
