مارات وماروۆ: ەلەكتروموبيلمەن ءجۇرۋ ەكى ەسە پايدالى
بيىل بولاتىن اگەنتتىكتەگى وزگەرىستەر مەن ترانسفەرت تەحنولوگيالار جۇيەسىنىڭ دامۋى مەن بيزنەس- ينكۋباتورلاردى سۋبسيديالاۋ جۇمىستارى جونىندە اگەنتتىك ءتوراعاسى مارات وماروۆ ايتىپ بەردى.
- وتكەن جىلى اگەنتتىك باسشىلىعىنا كەلدىڭىز، الدىڭىزعا قانداي ماقساتتار قويدىڭىز؟
ەكونوميكالىق تۇرعىدان العاندا الدىمەن بارلىق تاسىلدەردى دۇرىس تارازىلاۋ كەرەك. بۇگىنگى نارىققا نە كەرەك، اگەنتتىك نە ىستەۋ كەرەك جانە ءتيىمدى قولداۋدى قالاي جۇزەگە اسىرۋ كەرەك. مەن وسىنداي ماقساتپەن كەلدىم.
- گرانتقا ءوتىنىش بەرۋشىلەرگە قويىلاتىن تالاپتى نەلىكتەن كۇشەيتتىڭىز؟
- بايقاعانىمىز، قانشالىقتى از گرانت السا، ەكونوميكالىق تيىمدىلىگى سونشالىقتى كوپ. نەگىزگى تالاپتار اگەنتتىك پەن ءوتىنىش بەرۋشى اراسىندا تەحنولوگيا قۇنىنىڭ بىرلەسە قارجىلاندىرۋداعى تەپە- تەڭدىكتى قايتا قاراۋعا قاتىستى بولماق. بۇل كورسەتكىش بۇرىن 80 دە 20 پايىز دەڭگەيىندە بولىپ، شىعىننىڭ اۋقىمدى بولىگىن اگەنتتىك وتەپ كەلگەن. بۇدان بىلاي كورسەتكىش - 50 دە 50 پايىز بولماق. جيىنتىق تابىس ءۇش جىلدىڭ ىشىندە جوبانىڭ قۇنىن جابۋى كەرەك. ادام ءوز قالتاسىنان شىعاتىن قارجىسىمەن تاۋەكەل ەتىپ، جوبانىڭ جارتى قۇنىن ءوزى سالسا، بۇدان العا ىلگەرىلەۋشىلىك بايقالادى، دەمەك، ساپا دا جوعارى. جوبا يەسى 80 پايىز گرانت العان كەزدە، ول ەشقانداي قاتەرگە باس تىكپەيدى. سول ءۇشىن ءبىز تاۋەكەلدى تەڭ ءبولىپ، جوبا قۇنىنىڭ ءبىر بولىگىن ءوتىنىش بەرۋشىنىڭ وزىنە قالدىرامىز.
- اتقارىلىپ جاتقان جۇمىستارعا قاراماستان اگەنتتىك تاراپىنا كوپتەگەن سىندار ايتىلىپ جاتادى. بۇل نەلىكتەن؟
- مەنىڭشە، بۇل يننوۆاتسيالاردان حالىقتىڭ ۇلكەن ءۇمىت كۇتۋىنەن. سالىنعان قاراجاتقا سايكەس ادامدار قازاقستاندا جاڭا Google, Amazon نەمەسە Facebook پايدا بولسا دەيدى. مەنىڭشە بۇل ادىلەتسىز. كوپشىلىك جىلدام ناتيجە كورگىسى كەلەدى. جالعىز اگەنتتىكتىڭ نەمەسە جالعىز كومپانيانىڭ مۇنداي اۋقىمداعى جۇمىس كولەمىن يگەرۋگە شاماسى جەتپەيدى. بۇل جەردە كوپتەگەن فاكتورلار بار. ءار ينستيتۋت، نەمەسە بۇعان قاتىسى بار بارلىق ۇيىمدار بىرىگىپ كۇش سالۋى كەرەك. بۇل - ءبىلىم، قارجى سالالارىنا، جەكەمەنشىك سەكتور، ۇكىمەت جانە باسقا دا سالالارعا قاتىسى بار سۇراق. ءبارى بىرىكسە ناتيجە شىعۋى مۇمكىن.
- اگەنتتىكتە جەكەشەلەندىرۋ جۇمىستارى جوسپارلانعان با؟
- ءيا، تەحنولوگيالىق دامۋ جونىندەگى ۇلتتىق اگەنتتىك 100 پايىز «بايتەرەك» حولدينگىنىڭ ەنشىلەسى ۇيىمى بولىپ تابىلادى. اگەنتتىكتىڭ ءوزى تەحنوپاركتەر مەن كونسترۋكتورلىق بيۋرولاردان باستاپ جەكەشەلەندىرۋ تىزىمىندە تۇر. قازىر ستراتەگيالىق كەڭەسشىلەردى تاڭداپ الۋ جۇمىستارى ءجۇرىپ جاتىر. جىلدىڭ اياعىنا دەيىن ءبىز اگەنتتىككە ستراتەگيالىق سەرىكتەستەر تاۋىپ، جۇمىسىمىزدى جانداندىرامىز دەپ ويلايمىن.
- مەنشىك يەسى كىم بولۋى مۇمكىن؟
- الدىمەن اگەنتتىكتى ساتۋ الدىنداعى دايىندىق جۇمىستارىن جۇرگىزەمىز. بولاشاقتاعى ينۆەستور تۋرالى كەلىسىمدەر ودان كەيىن قولعا الىنادى.
- ەلەكتروموبيلدەرگە كوشۋ تۋرالى باستاماڭىز جونىندە ايتىپ بەرىڭىزشى، ءبىزدىڭ قىسقا ول جاراي ما؟
- مەن ول شەشىمدى باياعىدا قابىلداعام. قازىر جۇمىسقا، جينالىستارعا وپ- وڭاي بارىپ ءجۇرمىن. قۋاتى جەتىپ تۇر. ءبارى ايازدا قاتىپ قالادى دەپ ويلايدى، قاتقان جوقپىز، ءجۇرىپ ءجۇرمىز. كەرىسىنشە كولىكتى قىزدىرۋعا ۋاقىت كەتپەيدى. باتارەي تەز جىلىنادى. بەنزين تاپشىلىعىن سەزىنگەن جوقپىن. ەلەكروموبيلمەن ءجۇرۋ ەكى - ەسە پايدالى.
- اڭگىمەڭىزگە راحمەت
