الماتىدا مۇقاعالي ماقاتايەۆقا ارنالعان جىر كەشى ءوتتى

 استانا. قازاقپارات - قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇيىمداستىرۋىمەن «ەسىڭە مەنى العايسىڭ.. .» اتتى مۇقاعالي ماقاتايەۆتى ەسكە الۋ كەشى ءوتتى.

مۇزبالاق اقىننىڭ الماتىداعى ەسكەرتكىشىنىڭ الدىندا وتكەن ءداستۇرلى جيىندا وقۋ ورنىنىڭ ستۋدەنتتەرى جىر پاديشاسىنىڭ تۋىندىلارىن ورىنداپ، جۇرەكجاردى شىعارمالارىن وقىدى.

شاراعا بەلگىلى مەملەكەت جانە قوعام قايراتكەرى، پەداگوگ عالىم ءشامشا بەركىمبايەۆا، س. مۇقانوۆ پەن ع. مۇسىرەپوۆتىڭ ادەبي- مەموريالدىق مۋزەي كەشەنىنىڭ باسشىسى ءادىلعازى قايىربەكوۆ، قىزدار ۋنيۆەرسيتەتىنىڭ وقۋ جانە تاربيە ىستەرى جونىندەگى پرورەكتورى اباي قۇرمانقۇلوۆ، الەۋمەتتىك جانە تاربيە ءىسى جونىندەگى دەپارتامەنت ديرەكتورى جاڭاگۇل سۇلتانوۆا جانە وقۋ ورنىنىڭ ۇجىمى مەن ستۋدەنتتەرى قاتىستى.

جيىندى اشقان ءشامشا كوپباي قىزى جىر شايىرىنىڭ شىعارمالارىن وسكەلەڭ ۇرپاق اراسىندا كەڭىنەن ناسيحاتتاۋ ماقساتىندا وسىدان بىرنەشە جىل بۇرىن قولعا الىنعان يگىلىكتى ءىستىڭ داستۇرگە اينالعانىنا شىنايى العىسىن جەتكىزدى.

«مۇقاعالي - عۇمىرىنىڭ سوڭىنا دەيىن شىعارماشىلىقتان الىستاماي، قولىنان قالامى تۇسپەي، قازاقتىڭ قارا ولەڭىنىڭ قۇدىرەتى مەن سىرىنا مولىنان قانىققان اقىن. ولەڭ كيەسىنىڭ ءمانى مەن ماعىناسىنا تەرەڭ بويلاپ، ءسوز مارجانىن كەلىستى كەستەلەي بىلگەن ماقاتايەۆ مۇرالارى قازاق ادەبيەتىنە قوسىلعان باعا جەتپەس تۋىندىلار. «تۋادى، تۋادى ءالى ناعىز اقىن، ناعىز اقىن بال مەن ۋ تامىزاتىن. جەسىردىڭ ايىرىلماس سىرلاسى بوپ، جەندەتتىڭ كوزىنەن جاس اعىزاتىن» دەپ جىرلاعان مۇقاعالي ءوزى دە قازاقتىڭ قارا ولەڭىنىڭ حانتاڭىرىنە اينالىپ وتىر بۇگىندە. قاراكوز بويجەتكەندەردىڭ پوەزياعا دەگەن قۇشتارلىعىن ارتتىرۋ ماقساتىندا بىرنەشە جىل قاتارىنان «مۇقاعالي وقۋلارىن» وتكىزۋگە قىزدار ۋنيۆەرسيتەتى ۇيىتقى بولىپ كەلەدى. ءبىز اسپانتاۋدىڭ اقيىق اقىنىنىڭ جىرلارىمەن سۋسىنداۋ ارقىلى جاستاردى رۋحاني تۇرعىدا بايىتا الاتىنىمىزعا كامىل سەنىمدىمىز» ، - دەدى ءشامشا بەركىمبايەۆا.

ال، اقىن، حالىقارالىق «الاش» سىيلىعىنىڭ يەگەرى ءادىلعازى قايىربەكوۆ عابيت مۇسىرەپوۆ پەن مۇقاعالي ماقاتايەۆ اراسىنداعى ىزگى نيەت، ىستىق ىقىلاستان تۋعان «التىن قالام» اتتى باللادانى وقىپ بەردى.

جيىننىڭ ەكىنشى ءبولىمىنىڭ شىمىلدىعى الماتى قالاسىنداعى №90 بالاباقشا تاربيەلەنۋشىلەرىنىڭ اقىن ولەڭدەرىن جاتقا وقۋىمەن اشىلدى. اتاپ ايتقاندا، جانيا مامبەتوۆا «انا» ، ءىنجۋ مىڭدابەكوۆا «اناشىم» ، اياۋلىم عالىمجان ء«ۇش باقىتىم» جانە يسمايل نۇرىبايەۆ ورىنداعان «وتان» اتتى تۋىندىلار كوپشىلىكتىڭ كوڭىلىنەن شىقتى. سونىمەن قاتار، پوەزيا كەشى بارىسىندا قازاق ادەبيەتى كافەدراسىنىڭ جانىنان اشىلعان «نازقوڭىر» ۇيىرمەسىنىڭ مۇشەلەرى الاتاۋداي اسقار تالانتتىڭ تۋىندىلارىن ورىنداپ، ساحنالىق قويىلىمدى جۇرتشىلىق نازارىنا ۇسىندى.

اقىننىڭ ماڭگىلىك عۇمىرعا اينالعانىنىڭ تاعى ءبىر ايقىن دالەلى، جىل سايىن تۋعان كۇنى قارساڭىندا ەلىمىزدىڭ بارلىق ايماعىندا مۇقاعاليعا ارنالعان ادەبي كەشتەردىڭ ۇزدىكسىز وتكىزىلۋى. بۇل ءۇردىس ەشكىمنىڭ مىندەتتەۋىنسىز، جۇرەك قالاۋىمەن جۇزەگە اسىپ جاتقاندىعى تاڭدانىس تۋعىزاتىنى راس.

«جىر دۇلدۇلىنە ارنالعان ءمۇشايرالار مەن ءان كەشتەرى جىلدان جىلعا جالعاساتىنى ءسوزسىز. اقىن ءوزىنىڭ كۇندەلىگىندە «مەن ХХІ عاسىر ۇرپاقتارىنىڭ قۇرداسىمىن. ودان كەيىنگى ۇرپاقتىڭ دا تۋىسىمىن» دەگەن ەكەن. كەلەشەكتى بولجاپ كەتكەندەي بولعان اقىن كورەگەندىگىنە ەرىكسىز تاڭداناسىڭ. راسىمەن دە ХХІ  عاسىردىڭ ۇرپاقتارى اقىننىڭ قۇرداسىنا ءھام سىرلاسىنا اينالعان. وعان جىل سايىن ءبىلىم مەن عىلىمنىڭ قاراشاڭىراعى قىزدار ۋنيۆەرسيتەتىندە ءوتىپ جۇرگەن ءداستۇرلى «مۇقاعالي وقۋلارى» اتتى جىر جيىنى ناقتى دالەل بولا الادى» ، - دەپ اتاپ ءوتتى قىزدار ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اسان.

 

Baq.kz