ارنايى ەكونوميكالىق ايماقتار ءۇمىتىمىزدى اقتامادى - جەڭىس قاسىمبەك

استانا. قازاقپارات - ارنايى ەكونوميكالىق ايماقتار ءۇمىتىمىزدى اقتامادى. بۇل تۋرالى بۇگىن ق ر ينۆەستيتسيالار جانە دامۋ ءمينيسترى جەڭىس قاسىمبەك حالىقپەن ەسەپتىك كەزدەسۋى بارىسىندا ايتتى، دەپ حابارلايدى قازاقپارات.

«ارنايى ەكونوميكالىق ايماقتارعا ۇلكەن ساراپتاما جۇرگىزدىك. ناقتى كەمشىلىكتەر مەن ولقىلىقتار بار. ارنايى ەكونوميكالىق ايماقتاردىڭ ينفراقۇرىلىمىنا مول قارجى قۇيىلدى. ءبىز مەملەكەتتىك ينۆەستيتسيانىڭ ارقاسىندا قۇرىلعان 11 ا ە ا بۇگىندە ءبىز كۇتكەن ناتيجەنى بەرىپ وتىرعان جوق دەپ سانايمىز»، - دەدى مينيستر.

جەڭىس قاسىمبەكتىڭ ايتۋىنشا، مەملەكەت باسشىسىنىڭ تاپسىرماسىنا سايكەس، بارلىق ا ە ا- لاردىڭ باسشىلارىنا ايماقتاردىڭ جۇمىسىن ودان ارى جەتىلدىرۋ ءۇشىن ەسەپ الىناتىن بولادى. سونىمەن قاتار ارنايى ەكونوميكالىق ايماقتار تۋرالى زاڭ جوباسى ازىرلەنۋ ۇستىندە. اتالعان قۇجاتتا بارلىق زاڭنامالىق ولقىلىقتار مەن پروبلەمالى ماسەلەلەر ەسكەرىلەدى.

ينۆەستيتسيالار جانە دامۋ مينيسترلىگىنىڭ دەرەگىنە سايكەس، بۇگىندە ەلىمىزدە 11 ارنايى ەكونوميكالىق ايماق پەن 22 يندۋستريالدى ايماق جۇمىس ىستەپ تۇر. ا ە ا- لار قۇرىلعاننان بەرى 800 ميلليارد تەڭگەدەن استام سوماعا 165 جوبا ىسكە قوسىلىپ، 13 مىڭ جۇمىس ورنى اشىلدى. اعىمداعى جىلى 171,7 ميلليارد تەڭگەگە 45 جوبا ىسكە قوسۋ كوزدەلگەن. ناتيجەسىندە 3 مىڭ جاڭا جۇمىس ورنى قۇرىلادى. ال يندۋستريالدى ايماقتار الاڭىندا 100 ميلليارد تەڭگەگە 115 جوبا ىسكە قوسىلىپ، شامامەن 8 مىڭ جۇمىس ورنى اشىلدى.

اۆتور: مارلان جيەمباي