ءورت ءسوندىرۋ قىزمەتى «كادرلىق اشتىقتى» باستان كەشىپ جاتىر - ماجىلىسمەن

استانا. قازاقپارات - دەپۋتات تۇرعىن سىزدىقوۆ پارلامەنت ءماجىلىسىنىڭ جالپى وتىرىسىندا ءورت سوندىرۋشىلەردىڭ ماسەلەسىن كوتەردى، دەپ حابارلايدى «قازاقپارات» ح ا ا ءتىلشىسى.

ول ءى ءى م مەن ۇ ە م، قارجى مينيسترلىگى باسشىلارىنا دەپۋتاتتىق ساۋال جولدادى.

«توتەنشە جاعدايلار قىزمەتى ماماندارىنىڭ ەرلىككە پارا-پار جۇمىسى جوعارى جاۋاپكەرشىلىكتى تالاپ ەتۋمەن شەكتەلىپ قالماۋى كەرەك. ولار مەملەكەتتىڭ زور قولداۋىنا مۇقتاج. بۇگىن ءورت سوندىرۋشىلەردىڭ ماسەلەسىن كوتەرسەك دەپ وتىرمىز. سوڭعى 5 جىلدا رەسمي دەرەكتەرگە سايكەس، 70 مىڭعا جۋىق ءورت بولىپ، 2 مىڭعا جۋىق ادام ءتىلسىز جاۋدىڭ سالدارىنان قايتىس بولعان. ءبىزدىڭ ەسەپتەۋىمىزشە، اتالعان قىزمەتتە جۇرگەن ادامدارعا دەگەن كوزقاراستى وزگەرتۋ كەرەك. بۇرىنعى كوزقاراس بويىنشا ادامدار ءالى دە ءورت ءسوندىرۋ قىزمەتكەرلەرىن «ۇيقىداعى قىزمەتكەرلەر» دەپ ويلايدى. بۇل تۇسىنىك ازاماتتاردىڭ ساناسىن ءسىڭىپ قالعان. وسىنىڭ سالدارىنان بيۋدجەتتى ءبولۋ كەزىندە اتالعان قىزمەت ەڭ سوڭعى ساتىدا قالادى»، - دەيدى دەپۋتات.

ماجىلىسمەننىڭ ايتۋىنشا، ءورت ءسوندىرۋ قىزمەتىنەن كوپتەگەن كادرلاردىڭ كەتىپ جاتقانى الاڭداتادى.

«جاستار ءورت ءسوندىرۋ قىزمەتىنە جۇمىسقا ورنالاسقاننان كەيىن ءبىر ايدان سوڭ كەتىپ قالىپ جاتادى. ۇمىتكەر رەتىندەگى ءبىر ايلىق سىناق مەرزىمى، كاسىبي دايارلىق ءۇشىن وقۋ ورنىندا 2,5-اي وقۋ، ودان كەيىن ايىنا بار-جوعى 43 مىڭ تەڭگەگە 3-اي بويى سىناقتا ءجۇرۋ - ۇمىتكەرلەرگە ەشقانداي تاڭداۋ قالدىرمايدى»، - دەيدى ول.

دەپۋاتتتىڭ كەلتىرگەن مالىمەتىنە سۇيەنسەك، ءورت سوندىرۋشىلەردىڭ باسپانا ماسەلەسى دە شەشىلمەگەن. ال اسكەريلەر مەن پوليتسيا قىزمەتكەرلەرىنە بەرىلەتىن كوممۋنالدىق تولەمدەگى جەڭىلدىك، تەگىن جول ءجۇرۋ تج قىزمەتكەرلەرىندە قاراستىرىلماعان.

«جاس قىزمەتكەرلەرگە بەرىلەتىن ەڭبەكاقىنى ارتتىرۋ، سىناق مەرزىمىن قىسقارتۋ، جەڭىلدىكتەردى قالىپقا كەلتىرۋدىڭ ماڭىزى زور. وسى شارالار قولعا الىنسا، اتالعان سالادا كادرلىق «اشتىق» جويىلىپ، ولاردىڭ ءيميدجى ارت تۇسەر ەدى. ولاردىڭ ماتەريالدىق- تەحنيكالىق قامتىلۋى دا كوڭىل قۋانتارلىق ەمەس. ماسەلەن، قوستانايداعى ت ج د- دا اۆتوكولىكتىك شتاتى نورماتيۆكە سايكەس 647 تەحنيكا بولۋى كەرەك. ال قازىرگى تاڭدا وندا بار- جوعى 149 عانا. 2014 -جىلدان باستاپ 4 تەحنيكا عانا جەتكىزىلگەن»، - دەيدى دەپۋتات.

ماجىلىسمەن وسىنداي ماسەلە رەسپۋبليكاداعى بارلىق قالالار مەن اۋدانداردى مازالاپ وتىرعاندىعىن جەتكىزدى.

«سول سەبەپتى، جاۋاپتى مينيسترلىكتە ءورت ءسوندىرۋ قىزمەتتەرى ءۇشىن كولىكتىك كاسىپورىن اشۋدىڭ ماڭىزى زور. ۋاقتىلى ءورت شىققان جەرگە جەتۋ قيىندىق تۋعىزىپ بارادى. سول سەبەپتى وسى ماسەلەلەردى نەگىزگە العان دۇرىس دەپ ويلايمىن»، - دەپ ءتۇيدى سىزدىقوۆ.