ارالاس جەكپە-جەكتەن الەم چەمپيونى ارمان ءاشىموۆ تالدىقورعانعا كەلدى
جەكپە-جەك شەبەرى رەسەيدىڭ سانكت-پەتەربۋرگ قالاسىندا وتكەن چەمپيوناتتا فيندىك ميكاەل سيلاندەردى 2- راۋندتا ناكاۋتپەن جەڭگەن بولاتىن، دەپ حابارلايدى قازاقپارات ءتىلشىسى.
تالدىقورعاندىقتار م م ا ارالاس جەكپە-جەگىنىڭ ۋاقىتشا چەمپيون اتاعىن جەڭىپ العان ارمان اشىموۆكە قۇرمەت كورسەتتى.
ەستەرىڭىزگە سالا كەتەيىك قازاقستاندىق جەكپە-جەك شەبەرى ارمان ءاشىموۆ رەسەيدە وتكەن م-1 چەلەندج 87 ارالاس جەكپە-جەك تۋرنيرىندە جەڭىسكە جەتتى. سپورتشى 2- راۋندتا فيندىك ميكاەل سيلاندەردى نوكاۋتقا جىبەرىپ، ەڭ جەڭىل سالماق ساناتىندا ۋاقىتشا چەمپيون اتاندى.
ارمان ءاشىموۆ الماتى وبلىسى، تالعار اۋدانىنىڭ بەساعاش اۋىلىندا دۇنيەگە كەلگەن. جەتىسۋلىق جاس سپورتشى قازىرگى تاڭدا م م ا سپورتىنىڭ قازاقستان چەمپيونى. بىرنەشە جەكپە-جەك ءتۇرىنىڭ شەبەرى.
تالدىقورعان جاستارىمەن كەزدەسكەن ارمان ءاشىموۆ ءوز باپكەرلەرى جانە م م ا فەدەراتسيا باسشىلارىمەن باسپا ءسوز ءماسليحاتىن وتكىزدى. بولاشاق جوسپارلارىمەن ءبولىستى. م م ا جاۋىنگەرى الداعى ۋاقىتتا چەمپيون اتاعىن وزىندە قالدىرۋ ءۇشىن ۋكرايندىق الەكساندر دوسكالچۋكپەن كەزدەسۋدى جوسپارلاپ وتىر.
«جالپى الماتى وبلىسىنىڭ قۇراماسى م م ا جەكپە-جەگىندە كوش باستاپ كەلەدى. بىلتىرعى ەل چەمپيوناتىندا جەتىسۋلىق سپورتشىلار كوماندالىق ەسەپتە كوش باستادى. بيىل قازاقستان رەسپۋبليكاسىنىڭ چەمپيوناتىن تالدىقورعاندا وتكىزۋ ماسەلەسى قاراستىرىلۋدا»، - دەيدى قازاقستان م م ا فەدەراتسياسىنىڭ پرەزيدەنتى اناتولي كيم.
