قۋات دومباي: قازاقتىڭ مارك تۆەندەرى قايدا؟

الماتى. قازاقپارات - «التىن قالام» ادەبي بايقاۋىنىڭ ۇيىمداستىرۋ كوميتەتىنىڭ مۇشەسى قۋات دومباي قازاقتىڭ مارك تۆەندەرى مەن چارلز ديكەنستەرىن ىزدەيتىنىن ايتتى، دەپ حابارلايدى قازاقپارات ءتىلشىسى.

ادەبيەت سالاسىنداعى «التىن قالام» تاۋەلسىز بايقاۋىن ۇيىمداستىرۋشىلاردىڭ ءبىرى، قازاقستانداعى تۇڭعىش PR- مامانداردىڭ ءبىرى قۋات دومباي قازاق ادەبيەتىن دامىتۋ ءۇشىن جانرلاردى، كىتاپتى ساتۋ بويىنشا پروموۋشندى قولعا الۋ كەرەك ەكەنىن ايتتى.

«قازىر فانتاستيكالىق شىعارمالارعا، جاسوسپىرىمدەرگە ارنالعان ادەبيەت پەن شىتىرمان حيكايالارعا قۇرىلعان دەتەكتيۆ، روماندارعا وقىرمان سۇرانىسى بار ەكەنىن بايقايمىز. قازىر قازاق ادەبيەتى جاڭعىرۋ ساتىسىندا تۇر. بىزدە ادەبي سۇرانىستى بەرەتىن ينتەللەكتۋالدىق ورتا بار. مىسالى، مەكتەپ باعدارلاماسىندا قازىرگى قازاق ادەبيەتى دەگەن ءبولىم بار. 20 - عاسىرداعى ەمەس، 21 - عاسىرداعى قازاق ادەبيەتى كەرەك مەكتەپكە. قازاقتىڭ مارك تۆەنى، چارلز ديكەنستەرى قايدا؟ قازاق دەتەكتيۆتەرى قايدا؟ قازاق ادەبيەتىنە پروموۋشن كەرەك، ونى قوعامعا جەتكىزە ءبىلۋ جاڭا زامان تالابى. ءبىز «التىن قالامدى» ۇيىمداستىرۋ ارقىلى وسى ولقىلىقتاردى، جاسوسپىرىمدەر ادەبيەتىنىڭ اۆتورلارىن ىزدەيمىز»، - دەگەن مامان قازاق ادەبيەتىنە مەملەكەت تاراپىنان قولداۋ جەتىسپەيتىندىگىن تىلگە تيەك ەتتى.

«ماسەلەن، ءۇندىستاندا ادەبيەت سالاسىندا باسپالاردىڭ بارلىعى سالىقتان بوساتىلعان. مەملەكەت نەگە «جوقتان» اقشا الۋى كەرەك. ماسەلەن، قازاق ءتىلدى كىتاپتان پايدا جوق بولسا، باسپالارعا 16 پايىز سالىق سالۋدىڭ قانداي قاجەتى بار؟ يمپورت كىتاپتاردان سالىق السىن، ال ءبىراق قازاق ادەبيەتى سالاسىنداعى باسپاگەرلەردەن نە ءۇشىن سالىق الادى؟ مەملەكەت قازاق ادەبيەتىنەن قارجىلىق پايدا كورۋدى ويلاماۋى كەرەك. مەملەكەت جاعداي جاساي وتىرىپ، قولداۋى كەرەك. دەگەنمەن، قازاق ءتىلدى كىتاپتارعا دەگەن سۇرانىس ارتىپ كەلەدى. قازاق ءتىلدى وقىرمان بۇرىن 300 تەڭگەلىك جۋرنالدى ساتىپ السا، قازىر 2000-3000 تەڭگەنىڭ كىتاپتارىن ساتىپ الىپ وقيدى»، - دەدى قۋات دومباي.

اۆتور: الماس مۇقاش ۇلى