عابباس قابىش ۇلىنىڭ تۇرىك تىلىنە اۋدارىلعان «كوڭىل كوگىندە» جيناعىنىڭ تۇساۋى كەسىلدى

الماتى. قازاقپارات - الماتىدا عابباس قابىش ۇلىنىڭ تۇرىك تىلىنە اۋدارىلعان «كوڭىل كوگىندە» اتتى ەسسەلەر جيناعىنىڭ تۇساۋى كەسىلدى، دەپ حابارلايدى قازاقپارات ءتىلشىسى.

قازاقستان جازۋشىلار وداعىنىڭ مۇشەسى، حالىقارالىق «الاش» ادەبي سىيلىعىنىڭ لاۋرەاتى، كورنەكتى قالامگەر عابباس قابىش ۇلىنىڭ تۇرىك تىلىنە اۋدارىلعان «كوڭىل كوگىندە» اتتى ەسسەلەر جيناعىنىڭ تۇساۋ كەسەر ءراسىمى ۇلتتىق كىتاپحانانىڭ ن. داۋلەتوۆا اتىنداعى زالىندا ءوتتى.

كىتاپتىڭ اۋدارىلۋىنا قازاقستاننىڭ تۇركياداعى ەلشىلىگى مەن ەۋرازيا جازۋشىلار قاۋىمداستىعى مۇرىندىق بولعان. تۇساۋكەسەرگە انكارادان ارنايى كەلگەن ەلشىلىك قىزمەتكەرى، ديپلومات، جازۋشى مالىك وتاربايەۆ قازاقستاننىڭ تۇركياداعى ەلشىسى ابزال ساپاربەك ۇلىنىڭ قۇتتىقتاۋىن وقىپ بەردى.

«كىتاپ ەلباسى نۇرسۇلتان نازاربايەۆتىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى مەن «بولاشاققا باعدار: رۋحاني جاڭعىرۋ» باعدارلاماسى اياسىندا تۇرىك تىلىنە اۋدارىلدى. 2014 -جىلدان بەرى 30-دان استام قالامگەردىڭ كىتاپتارى اۋدارىلىپ باسىلىپ، ناسيحاتتالىپ جاتىر. تۇركيادا كىتاپ شىعارۋ وڭاي ەمەس. ءبىراق شۇكىر، تۇرىك باۋىرلاردىڭ قازاقتىڭ ءسوز ونەرىنە دەگەن ىقىلاسى جوعارى»، - دەدى مالىك وتاربايەۆ جازۋشىنى قۇتتىقتاي كەلە.

جازۋشى الىبەك اسقاروۆ اتالعان ەڭبەككە ساعىنىشقا تولى جيناق دەگەن باعا بەردى.

«عابباس اعانىڭ كىتابى ساعىنىشقا تولى كىتاپ. اعالارىنا، 60-70 - جىلدارداعى ادالدىققا دەگەن ساعىنىش بار. كىتاپتىڭ تۇرىك تىلىنە اۋدارىلعانى دا قۋانتىپ وتىر. كىتاپتى 60- جىلدارداعى ادامگەرشىلىك ءداۋىرىنىڭ گيمنى دەسە دە بولادى»، - دەدى الىبەك اسقاروۆ.

كىتاپ ەۋرازيا جازۋشىلار قاۋىمداستىعىنا قاراستى «بەنگۋ» باسپاسىنان شىعىپ وتىر.

اۆتور: الماس مۇقاش ۇلى