جاڭا باسشى ەڭبەك مينيسترلىگىندەگى بيىل قاي باعىتتارعا باسىمدىق بەرىلەتىنىن اتادى
«ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسى 2018 -جىلى مەملەكەت باسشىسىنىڭ جۇكتەگەن مىندەتتەرىنە ساي باعىتتالادى. فورمالدى ەمەس جانە ءوزىن-ءوزى جۇمىسپەن قامتىپ وتىرعانداردىڭ جۇمىسىن زاڭداستىرۋ ماسەلەلەرىنە قاتىستى زاڭ جوباسى ازىرلەنەدى. ول زاڭ جوباسىنىڭ اياسىندا ءوزىن- ءوزى جۇمىسپەن قامتىعانداردىڭ جۇمىسىن تىركەۋدىڭ مىندەتتى جەڭىلدەتىلگەن ءتۇرى ەنگىزىلەدى»، - دەيدى ءمادينا ءابىلقاسىموۆا.
جاڭا ءمينيستردىڭ ايتۋىنشا، ءوزىن- ءوزى جۇمىسپەن قامتىپ وتىرعانداردى كولەڭكەدەن شىعارۋ ءۇشىن سالىقتىق جەڭىلدىكتەردى ۇسىنۋ قاراستىرىلىپ وتىر.
«قۇرمەتتى باقىتجان ءابدىر ۇلى، وسى ماسەلەنىڭ وزەكتىلىگىنە بايلانىستى ۇكىمەتتىڭ جۇمىس جوسپارى نەگىزىندە زاڭ جوباسىن ەنگىزۋدى وسى جىلدىڭ ەكىنشى توقسانىنا شەگەرۋدى سۇرايمىز. قارجى مەن ۇلتتىق ەكونوميكا مينيسترلىكتەرىنە ءتيىستى تاپسىرما بەرىپ، سالىق كودەكسىنە ۇسىنىلعان وزگەرىستەردى جەدەل تارتىپتە قاراۋدى تاپسىرۋدى وتىنەمىز»، - دەدى ءمادينا ءابىلقاسىموۆا.
ءمينيستردىڭ سوزىنە سەنسەك، قازاقستاندا تىركەلمەگەن ءوزىن- ءوزى جۇمىسپەن قامتۋشىلاردى ەل ەكونوميكاسىنا جۇمىلدىرۋ ءۇشىن جول كارتاسى ازىرلەنبەك.
ايتا كەتسەك، نۇرسۇلتان نازاربايەۆ 9 -اقپان كۇنى وتكەن ۇكىمەتتىڭ كەڭەيتىلگەن وتىرىسىندا ءوزىن- ءوزى جۇمىسپەن قامتىعاندارعا قاتىستى ەڭبەك جانە حالىقتى الەۋمەتتىك قورعاۋ مينيسترلىگىن سىنعا العان بولاتىن. ۇكىمەتتىڭ كەڭەيتىلگەن وتىرىسىنان كەيىن اتالعان مينيسترلىكتىڭ باسشىسى اۋىسىپ، ۆەدومستۆوعا جەتەكشىلىك ەتۋگە ءمادينا ءابىلقاسىموۆا كەلگەن ەدى.
