داۋرەن ابايەۆ: اۋىلدار جىلدام ءارى ساپالى ينتەرنەتتى كۇتىپ وتىر

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ ۇكىمەت باسشىسىنا اۋىلداردى ينتەرنەتپەن قامتاماسىز ەتۋ جوسپارى تۋرالى بايان ەتتى، دەپ حابارلايدى «قازاقپارات» ح ا ا ءتىلشىسى.

«2021 -جىلعا دەيىن مينيسترلىك 1249 اۋىلدى جوعارى جىلدامدىقتى ينتەرنەتپەن قامتاماسىز ەتۋدى جوسپارلاۋدا. قامتۋ اۋماعىندا 2,5 ميلليون حالىق تۇرادى. سونىمەن بىرگە، LTE-800 تەحنولوگياسى بويىنشا 800 مىڭ حالىق تۇراتىن 2,5 مىڭ اۋىلدىق ەلدى مەكەن قامتىلادى»، - دەدى مينيستر ۇكىمەت وتىرىسىندا.

داۋرەن ابايەۆتىڭ ايتۋىنا قاراعاندا، الىستاعى اۋىلداردى سپۋتنيك جۇيەسى ارقىلى ينتەرنەتپەن قامتۋ كوزدەلگەن.

«ءبىز بۇل جۇمىستىڭ ماڭىزدىلىعىن تۇسىنەمىز. جالپى، بەلگىلى ءبىر دارەجەدە ەلدى مەكەندەردىڭ بارلىعى ينتەرنەتپەن قامتىلعان. البەتتە، بۇل جەردە ينتەرنەتتىڭ ساپاسى تۋرالى ايتىپ وتىرمىز. كەيبىر قالالاردا ينتەرنەت قىزمەتى تىم جەدەل. الەمدىك ستاندارتتارعا ساي. ءبىراق، شالعاي اۋىلداردا ينتەرنەت وتە ءالسىز»، - دەپ ءتۇسىندىردى مينيستر.

مينيستر الىس اۋىلداردا ينتەرنەت قىزمەتىن قوسۋعا جەكە كومپانيالار اسا قىزىعۋشىلىق تانىتپايتىنىن ايتادى.

«سوندىقتان، مەملەكەت پرەزيدەنتتىڭ جۇكتەگەن مىندەتى بويىنشا وسى تاپسىرمانى قولعا الادى. اۋىلدار جىلدام ءارى ساپالى ينتەرنەتتى كۇتىپ وتىرعانىن تۇسىنەمىز. اسىرەسە، ەلەكتروندى كوممەرتسيا ارقىلى ءوز ءونىمىن ەشقانداي دەلدالسىز ساتۋ ءۇشىن ينتەرنەتتى فەرمەرلەر كۇتىپ وتىر. زاماناۋي ونلاين- كۋرستاردان ءوتۋ ءۇشىن مۇعالىمدەر دە كۇتۋدە. كەڭەس ارقىلى وپەراتسيا جۇرگىزۋ ءۇشىن دەنساۋلىق ساقتاۋ سالاسىنىڭ ماماندارىنا دا ينتەرنەت اسا قاجەت. وسى جىلدىڭ وزىندە الماتى مەن استانا قالالارىنداعى ارىپتەستەرىمەن كەڭەس ارقىلى قاشىقتاعى اۋدان ورتالىقتارىندا وتا جۇرگىزگەندەر بار»، - دەپ ءتۇيدى مينيستر.