قازاقستاندا يپوتەكا ارزانداتىلماق
بۇل تۋرالى بۇگىن ۇكىمەت وتىرىسىندا اتالعان ۆەدومستۆونىڭ باسشىسى جەڭىس قاسىمبەك ءمالىم ەتتى، دەپ حابارالايدى قازاقپارات.
«اعىمداعى جىلى بۇل باعدارلامانى ودان ارى جۇزەگە اسىرۋ مەحانيزمدەرىن قايتا قاراستىراتىن بولامىز. مەملەكەت باسشىسىنىڭ تاپسىرمالارىن جۇزەگە اسىرۋ اياسىندا ءبىز ساۋلەت، قالا قۇرىلىسى جانە قۇرىلىس سالاسىنداعى مەملەكەتتىك نورماتيۆتەردى جەتىلدىرۋ بويىنشا جۇمىستاردى باستادىق. سونىمەن قاتار باسپانانىڭ قولجەتىمدىلىگىن قامتاماسىز ەتۋ ماقساتىندا 2030 -جىلعا قاراي ءبىر تۇرعىندى 30 شارشى مەترگە دەيىن باسپانامەن قامتاماسىز ەتۋ كورسەتكىشىنە جەتكىزۋ ارقىلى يپوتەكالىق نەسيەلەۋ قۇنىن ارزانداتۋ بويىنشا ماسەلەلەردى قاراستىرۋدامىز»، - دەندى جەڭىس قاسىمبەك.
ونىڭ دەرەگىنشە، اعىمداعى جىلى كوممەرتسيالىق بانكتەر قۇرىلىسشىلارعا 125 ميلليارد تەڭگە سۋبسيديالانعان نەسيە، سونىمەن قاتار 105 ميلليارد تەڭگە يپوتەكالىق نەسيە بەرەتىن بولادى.
«بانك سەكتورىنىڭ جاندانۋى جىل سايىن 250 ميلليارد تەڭگەگە دەيىن كرەديت بەرۋ كولەمىن ارتتىرادى، جانە «تۇرعىن ءۇي قۇرىلىس جيناق» بانكى سالىمشىلارىنىڭ ۇلەسىن ەكونوميكالىق بەلسەندى حالىقتىڭ 12 پايىزىنا جەتكىزەدى»، - دەدى مينيستر.
