جەرگىلىكتى تۇرعىندار جولداعى شۇڭقىرلاردى توسەككە ارنالعان ماتراسپەن جاماعان

استانا. قازاقپارات - رەسەيدىڭ ۆورونەج قالاسىندا جەرگىلىكتى تۇرعىندار جولداعى شۇڭقىرلاردى ماتراستارمەن جاماعان.

«ەرەكشە جول توسەمەسىنىڭ» فوتوسى الەۋمەتتىك جەلىلەردىڭ بىرىندەگى «ناعىز ۆورونەج» توبىندا جاريالانعان.

فوتوعا قالدىرىلعان جازبادا بۇل قالانىڭ ورتالىق بولىگىندەگى زاستاۆا اۋدانىندا ورىن العانى كورسەتىلگەن.

پايدالانۋشىلار فوتوعا قاتىستى ءتۇرلى پىكىرلەر جازىپ قالدىرۋدا. ولاردىڭ كەيبىرى قازىناعا تولەنگەن سالىقتىڭ قايدا كەتىپ جاتقانى بەلگىسىز ەكەندىگى تۋرالى ماسەلەنى كوتەرىپ، «مۇمكىن سول اقشاعا اۋلاداعى اسفالتتى ءوزىمىز-اق توسەپ الارمىز؟» دەيدى.

تاعى بىرەۋلەر مۇنى «جۇمساق» جولداردىڭ تەڭدەسسىز تەحنولوگياسىنا تەڭەسە، ەندى ءبىرى ماتراستاردى اۆتوتۇراقتاعى ءوز ورنىن بەلگىلەپ قويۋ ءۇشىن پايدالانعان شىعار دەپ توپشىلايدى.

دەرەككوزى: www.segodnya.ua