قىزىلوردالىق عالىمدار «اق ءتوس» اتتى روبوت ءيت قۇراستىردى
سىر وڭىرىندە بيىل روبوتتىق تەحنيكا مەن IT ماماندارىن دايارلاۋعا ەرەكشە ماڭىز بەرىلىپ وتىر. ولاردىڭ العاشقى لەگى تاتارستاننىڭ يننوپوليس ينستيتۋتىندا وبلىس اكىمدىگىنىڭ گرانتى نەگىزىندە ءبىلىم الماق.
قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ جاس عالىمدارى جاساعان بۇل روبوت اياعىن تەڭ باسقان روبوت رەتىندە ەلىمىزدە العاش رەت قۇراستىرىلىپ وتىر. كوبىنە مۇنداي قۇلتەمىرلەر دوڭگەلەك ارقىلى سىرعيدى. جاس عالىمدار بۇل دۇنيەسىن «اق ءتوس» دەپ اتاپتى. ازىرگە روبوت يتكە ءتان قيمىلداردى جاساي الادى. ەندى ارنايى ونىڭ ءيىستى، جارىقتى، دىبىستى، تەمپەراتۋرا مەن ادامداردىڭ ءتۇر- كەلبەتىن اجىراتۋ سەكىلدى مۇمكىندىكتەرىن ارتتىرۋ كوزدەلىپ وتىر.
«بۇل جەردە ءبىز ستۋدەنتكە روبوتتىڭ نە ەكەنىن، قايدان شىققانىن، قالاي جاسالاتىنىن بارلىعىن ءۇتىر-نۇكتەسىنە دەيىن كورسەتتىك. بۇل جەردە 3D پرينتەردى كەلىستىرە وتىرىپ، بىرگە جۇمىس جاساپ، ءاقتوس روبوتىن جاساپ شىعاردىق»، - دەيدى ۋنيۆەرسيتەتتىڭ ەسەپتەۋ تەحنيكاسى جانە اقپاراتتىق جۇيەلەر كافەدراسىنىڭ مەڭگەرۋشىسى ءسابيت يبادۋللا.
مۇنان سوڭ عالىم وزگە ۋنيۆەرسيتەت ىزدەنۋشىلەرى «سمارت مۇراجاي» باعىتىندا دا ىزدەنىس ۇستىندە ەكەنىن، ول ءۇشىن وقۋ ورنىندا بارلىق جاعداي جاسالىپ وتىرعانىن ايتتى.
سونداي-اق، وقۋ ورنى جانىنان كومپيۋتەرلىك جەلىلەردى جوبالاۋ، قۇرۋ، قورعاۋ باعىتىندا ءبىلىم بەرەتىن بۇكىلالەمدىك اكادەميانىڭ وكىلدىگى دە اشىلعان. بولاشاق IT مامانداردى شەتەلدىڭ وقۋ ورىندارىندا وقىتۋعا دا باسىمدىق بەرىلىپ وتىر. تاعى ءبىر جاعىمدى جاڭالىق اعىمداعى جىلدىڭ قاڭتار ايىندا تاتارستان رەسپۋبليكاسىنىڭ يننوپوليس ينستيتۋتىندا 20 ماماندى دايىنداۋعا كەلىسىم جاسالىپ وتىر ەكەن.
جالپى بۇگىندە وڭىرگە قاجەتتى ماماندىقتار بويىنشا 452 قىزىلوردالىق تۇلەك رەسەي فەدەراتسياسىنىڭ گرانتى نەگىزىندە ءبىلىم الۋدا. ولار الداعى ۋاقىتتا سىر وڭىرىندە ىسكە قوسىلاتىن شىنى زاۋىتى مەن شالقيا كەنىشى سەكىلدى ءوندىرىس ورىندارىندا قىزمەت ىستەيدى.
ايتا كەتەيىك، وتكەن جىلى مەكتەپ بىتىرگەن ءوڭىر تۇلەكتەرىنىڭ 97 پايىزى وقۋ ورىندارىنا تۇسكەن. ال ۇلتتىق ءبىرىڭعاي تەستىلەۋ ناتيجەسى بويىنشا قىزىلوردا وبلىسى ەل وڭىرلەرى اراسىندا 5-ورىنعا كوتەرىلدى.
