مەيرامبەك بەسبايەۆ: پلانەتاعا سىيماي جۇرگەن جاستاردى كورىپ ءجۇرمىز

 استانا. قازاقپارات - مەيرامبەك بەسبايەۆ كەي جاستاردىڭ جەر- كوككە سىيماي جۇرگەنىن اشىنا ايتتى. ءانشىنىڭ پىكىرىنشە، ونداي ادامدى تاربيەلەۋگە تىرىسۋدىڭ ءوزى بوس اۋرەشىلىك.

 ول ەلگە مىنەز كورسەتكەندەردى جاراتقاننىڭ ءوزى ورنىنا قويادى دەگەن پىكىردە. سونداي- اق، بەسبايەۆ العاش رەت تورەعاليدىڭ ەرسى ارەكەتىنە قاتىستى پىكىرىن ءبىلدىردى.

بۇل تۋرالى 31 -ارنانىڭ «ايتا بەرسىن» باعدارلاماسىنا سىلتەپ Stan.kz حابارلايدى.

«قانشا تالانتتى بولسىن، قانداي اسپانداعى جۇلدىز بولسىن ادامگەرشىلىككە، تاربيەگە كەلىپ تىرەلەدى. كەنەن اتام: «جاماننان جاقسى تۋسا دا، جاقسىدان جامان تۋسا دا، ءتۇبى تارتپاي قويماس نەگىزگە»، - دەيدى. ءتۇبى قالپى دۇرىس بولماسا، ول ءبارىبىر ءبىر جەردەن شىعىپ تۇرادى. قازىرگى جاستارعا تاربيە، ءتارتىپتىڭ جەتىسپەۋشىلىگىنەن شىعار دەپ ويلايمىن. ونىڭ ۇستىنە، باقتى كوتەرە الاتىن، كوتەرە المايتىن جاندار بار. اياق استىنان باعى جانىپ كەتكەن كەزدە ادام ءوزى تۇسىنبەي قالۋى مۇمكىن. پلانەتاعا سىيماي كەتىپ جاتقان جاستاردى كورىپ ءجۇرمىز، وكىنىشكە قاراي. ءبىراق ءبارىبىر ونى اللا تاعالا تاۋبەسىنە كەلتىرەدى. ونى ادام بالاسى، تۋعان- تۋىسى كەلتىرە المايدى. قالاي قۇيىلدى، سولاي كەتەدى. ايت- ايتپا ءبارىبىر ەكەن، اللا ءوزى رەتكە كەلتىرەدى»، - دەيدى مەيرامبەك.

بەسبايەۆ ءبىر كەزدەرى ءوزىنىڭ دە باسىنا بەرىلگەن باقتى كوتەرە الماي كەتكەنىن ەسكە الدى. الايدا تۋرا جولعا قايتا تۇسۋىمە ۇستازىم التىنبەك قورازبايەۆتىڭ كومەگى كوپ ءتيدى، دەيدى ءانشى.

«التىنبەك قورازبايەۆتىڭ قاسىندا جۇرگەننەن كەيىن شىعار، كوپ نارسەدەن ءوزىمدى تەجەپ وتىرعانىم. بالا كۇنىمدە وڭشەڭ جۇلدىزداردىڭ ورتاسىنا تۇسە سالۋ ماعان دا وڭاي تيگەن جوق. بۇكىل مەكتەپتە تانىپ جاتادى، كەيدە ساباق وقىماعان كەزدە مۇعالىمدەر دە كوز جۇما قارايتىن. سونىڭ ءبارى مىنەزىمە كەرى اسەر ەتكەن تۇستارى بولدى. ءبىراق كوكەمنىڭ ارقاسىندا تۋرالادىق دەپ ايتۋعا بولادى»، - دەيدى مەيرامبەك.