قىزىلوردالىق جاس عالىمدار روبوت ءيت قۇراستىرىپ شىقتى

بەيجىڭ. قازاقپارات -  قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ جاس عالىمدارى روبوت ءيت قۇراستىردى.

يننوۆاتسيالىق تەحنولوگيالىق جوبا قوعامدىق قاۋىپسىزدىك ماقساتىندا قولعا الىنعان. جالپى سىر وڭىرىندە بيىل روبوتتىق تەحنيكا مەن IT ماماندارىن دايارلاۋعا ەرەكشە ماڭىز بەرىلىپ وتىر. ولاردىڭ العاشقى لەگى تاتارستاننىڭ يننوپوليس ينستيتۋتىندا وبلىس اكىمدىگىنىڭ گرانتى نەگىزىندە ءبىلىم الماق.

ءتورت اياعىن تەڭ باسقان روبوت ەلىمىزدە العاش رەت قۇراستىرىلىپ وتىر. كوبىنە مۇنداي قۇلتەمىرلەر دوڭگەلەك ارقىلى سىرعيدى ەكەن. جاس عالىمدار بۇل دۇنيەسىن «اقءتوس» دەپ اتاپتى. ازىرگە روبوت يتكە ءتان قيمىلداردى جاساي الادى. ەندى ارنايى ونىڭ ءيىستى، جارىقتى، دىبىستى، تەمپەراتۋرا مەن ادامداردىڭ ءتۇر- كەلبەتىن اجىراتۋ سەكىلدى مۇمكىندىكتەرىن ارتتىرۋ كوزدەلىپ وتىر.

ءسابيت يبادۋللا، ەسەپتەۋ تەحنيكاسى جانە اقپاراتتىق جۇيەلەر كافەدراسىنىڭ مەڭگەرۋشىسى:

- بۇل جەردە ءبىز ستۋدەنتكە روبوتتىڭ نە ەكەنىن، قايدان شىققانىن، قالاي جاسالاتىنىن بارلىعىن ءۇتىر- نۇكتەسىنە دەيىن كورسەتتىك. بۇل جەردە D3 پرينتەردى كەلىستىرە وتىرىپ، بىرگە جۇمىس جاساپ، اقءتوس روبوتىن جاساپ شىعاردىق.

مۇنان وزگە ۋنيۆەرسيتەت ىزدەنۋشىلەرى «سمارت مۇراجاي» باعىتىندا دا ىزدەنىس ۇستىندە. ول ءۇشىن وقۋ ورنىندا بارلىق جاعداي جاسالىپ وتىر. قازاقستاندىق روبوتوتەحنيكا فەدەراتسياسىمەن دە بايلانىس ورناتقان. سونداي- اق وقۋ ورنى جانىنان كومپيۋتەرلىك جەلىلەردى جوبالاۋ، قۇرۋ، قورعاۋ باعىتىندا ءبىلىم بەرەتىن بۇكىلالەمدىك اكادەميانىڭ وكىلدىگى اشىلدى. بولاشاق IT مامانداردى شەتەلدىڭ وقۋ ورىندارىندا وقىتۋعا دا باسىمدىق بەرىلىپ وتىر.

باعدات كامبوزوۆ، وبلىستىق ءبىلىم باسقارماسى باسشىسىنىڭ ورىنباسارى:

- الداعى ۋاقىتتى نەگىزگى باعىتتاردىڭ ءبىرى بولىپ، وسى مەكتەپ بىتىرۋشىلەرىمىزدى IT مامانداردىقتارىنا باعىتتاۋ بولىپ سانالادى. ءوز كەزەگىندە وسى اعىمداعى جىلدىڭ قاڭتار ايىندا تاتارستان رەسپۋبليكاسىنىڭ يننوپوليس ينستيتۋتىندا 20 ماماندى دايىنداۋعا كەلىسىم جاسالىپ وتىر.

جالپى بۇگىندە وڭىرگە قاجەتتى ماماندىقتار بويىنشا 452 قىزىلوردالىق تۇلەك رەسەي فەدەراتسياسىنىڭ گرانتى نەگىزىندە ءبىلىم الۋدا. ولار الداعى ۋاقىتتا سىر وڭىرىندە ىسكە قوسىلاتىن شىنى زاۋىتى مەن شالقيا كەنىشى سەكىلدى ءوندىرىس ورىندارىندا قىزمەت ىستەيدى.

ايتا كەتەيىك، وتكەن جىلى مەكتەپ بىتىرگەن ءوڭىر تۇلەكتەرىنىڭ 97 پايىزى وقۋ ورىندارىنا تۇسكەن. ال ۇلتتىق ءبىرىڭعاي تەستىلەۋ ناتيجەسى بويىنشا قىزىلوردا وبلىسى ەل وڭىرلەرى اراسىندا 5 ورىنعا كوتەرىلدى.

اۆتورلارى: نۇرلان جاقىپبەكوۆ، ءالحايدار تۇرلىحانوۆ

http://24.kz/kz