بۇگىنگى جەمقورلار وتە ساۋاتتى - مۇرات ابەنوۆ
بۇل جايىندا بۇگىن ق ر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «اتامەكەن» ۇلتتىق كاسىپكەرلەر پالاتاسىنىڭ وكىلى مۇرات ابەنوۆ ايتتى، دەپ حابارلايدى قازاقپارات.
«سوڭعى كەزدەرى جەمقورلىق فاكتىلەرى ورىن العان جاعدايدا ۆاتساپ ارقىلى ۆيدەو تارايتىن بولىپ ءجۇر. وعان سەنە بەرۋگە بولمايدى. ويتكەنى، سودان كەيىن جۋرناليستەر جاۋاپكەرشىلىككە تارتىلىپ جاتادى. وسىعان وراي ءبىز اگەنتتىككە (ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى) سىبايلاس جەمقورلىق بويىنشا ماقالا جازاتىن جۋرناليستەرگە جۇمىس ىستەۋ تاسىلدەرىن كورسەتىپ، تەحنولوگيالاردى ۇيرەتۋ جونىندەگى ۇسىنىس جاسادىق. اگەنتتىك قابىلدادى»، - دەدى مۇرات ابەنوۆ.
سونىمەن قاتار ول بارلىق مەملەكەتتىك ورگانداردىڭ باسپا ءسوز حاتشىلارىن كەز كەلگەن جاعدايدا قالاي جەدەل جۇمىس ىستەۋ قاجەتتىگىن، جەدەل اقپاراتتى قالاي بەرۋ كەرەكتىگىن ۇيرەتۋ قاجەتتىگىن ايتتى.
«جالپى، جەمقورلار وتە ساۋاتتى. جىلدان جىلعا جەمقورلاردىڭ ساۋاتتىلىعى جوعارىلاپ كەلەدى. ينتەرنەت ارقىلى ءبىر-بىرىنە پارا بەرەدى، شەتەلدەن ەسەپشوت اشادى. كوزگە كورىنبەيتىندەي ارەكەتتەر جاسايدى. ولاردى اشۋ ءۇشىن جۋرناليس تە، قوعام دا ساۋاتتى بولۋى ءتيىس»، - دەدى ول.
ال «ازاماتتىق اليانس» ازاماتتىق قۇقىق وداعىنىڭ پرەزيدەنتى دۋامبەك مۇساعالي جەمقورلىق فاكتىلەرىنە قاتىستى مالىمەتتەردى جاريالايتىن ارنايى باسپا ءسوز كلۋبىنىڭ بولعاندىعىن، ءبىراق، جۋرناليستەردىڭ بەلسەندىلىك تانىتپاۋى سالدارىنان جابىلعانىن اتاپ ءوتتى.
«ءبىز تالاي رەت باسپا ءسوز ءماسليحاتىن ۇيىمداستىرعان كەزدە جۋرناليستەر كەلۋىن قويدى. ولار الدىن الا قانداي تاقىرىپ ەكەندىگىن سۇراپ الىپ، قىزىقسىز بولسا كەلمەي قويادى. سودان كەيىن اتالعان كلۋبىمىزدى جاپتىق. جۋرناليستەر بەلسەندىلىگىنىڭ باسەڭدەۋى سالدارىنان الەۋمەتتىك جەلى قاتتى دامىپ كەتتى»، - دەدى دۋامبەك مۇساعالي.
