يۋليا گالىشەۆا: ومىرىمدە تۇڭعىش رەت قاتتى تولقىدىم

استانا. قازاقپارات - وڭتۇستىك كورەيا ەلىندە ءوتىپ جاتقان قىسقى وليمپيادا ويىندارىندا فريستايل- موگۋلدان قازاقستاننىڭ قورجىنىنا تۇڭعىش مەدال سالعان يۋليا گالىشەۆا «قازاقپارات» ح ا ا تىلشىسىنە جارىس الدىندا قانداي سەزىمدە بولعانىن ايتىپ بەردى.

- وليمپيادا ويىندارىنا ءبىر اي بۇرىن قولىڭىز جاراقاتتاندى. جارىس كەزىندە قولىڭىز اۋىردى ما؟ گيپسپەن جارىس جولىنا شىقتىڭىز با؟

- ەڭ قىزىعى قولىمنىڭ اۋىرعانى جاتتىعۋ كەزىندە مۇلدە سەزىلگەن جوق. ءبىراق جارىس الدىندا ازداپ سەزىلدى. بۇكىل سايىس بويى قولىمنىڭ جاراقاتىن ويلاۋمەن بولدىم.

جارىس كەزىندە گيپس قولعاپقا سىيمايتىندىقتان، ارنايى لانگەت وراپ شىعۋعا تۋرا كەلدى. قازىر دە تاعىپ ءجۇرمىن. قولىم ءالى دە جازىلعان جوق.

- ستارت كەزىندە ءوزىڭىزدى ءوزىڭىز قالاي دايىندادىڭىز؟ سايىس الدىندا قانداي دا ءبىر ىرىم جاسايسىز با؟

- ستارت الدىندا ادەتتەگىدەي جاقسىلاپ ۇيقىمدى قاندىرىپ، مۋزىكا تىڭدادىم. سايىس وتەتىن كۇنى تاڭەرتەڭ وليمپيادا اۋىلىنداعى تۇراقتا فۋتبول ويناپ، ستارتقا تارتتىق.

ەشقانداي ىرىم جاسامايمىن. ءاردايىم كەشىگىپ قالۋدان ساقتاناتىندىقتان، باراتىن جەرىمە ەرتە شىعامىن.

- فينال-1 ءسىز ءۇشىن اسا ءساتتى بولدى دەۋگە كەلمەيدى. فينال-2 جانە فينال-3 الدىندا باپكەرىڭىز ەلەنا كرۋگلىحينا سىزگە نە دەدى؟

- ستارت الدىندا ەشقاشان ۋايىمدامايتىن ەدىم، بۇل جولى تۇڭعىش رەت ايتارلىقتاي قاتتى تولقىدىم دەسەم دە بولادى. ەلەنا كرۋگلىحينا مەنىڭ ۋايىمعا بەرىلىپ كەتپەۋىم ءۇشىن ءبارىن جاسادى. باپكەر ماعان ءاردايىم قاتەلىكتەرىمدى ايتىپ، سولاردى بارىنشا تەز تۇزەۋ كەرەكتىگىمدى ەسكە سالاپ وتىردى.

- فينال-3 الدىندا نەنى سەزىندىڭىز؟ تابىسقا جەتۋ ءۇشىن ءوز ادىسىڭىزگە قانداي وزگەرىس ەنگىزۋ كەرەك بولدى؟

- فينال الدىندا ادەتتەگىدەي سابىرلى بولدىم. قالاي دايىن بولدىم، سولاي وتە شىقتىم. البەتتە، بۇدان دا جاقسى ءجۇرىپ وتۋگە بولار ەدى. ءبىراق، بولارى بولدى. التىنشى ورىندا قالىپ قويامىن با دەپ قاۋىپتەنگەنىمدى ەسكەرمەسەم، ءبارى ويداعىداي بولعان سەكىلدى.

- قانداي مۋزىكاعا اۋەسسىز؟

- جارىس كۇنى بولمەمنەن شىققانشا قۇلاعىمنان قۇلاققاپ تۇسكەن جوق. كەيىن مەنىڭ وليمپيادالىق رەپەرتۋارىم تۋرالى بىلە جاتارسىزدار. بالكىم، كوپ ادام قانداي مۋزىكا تىڭدايتىنىما تاڭعالۋى مۇمكىن (كۇلدى).

- ەرەكشە سىيلىققا يە بولدىڭىز؟ قازىر قانداي سەزىمدەسىز؟

- بۇل مەنىڭ نەمەسە مەنىڭ وتباسىمنىڭ، باپكەرىمنىڭ عانا ەمەس، بۇكىل قازاقستاننىڭ جەڭىسى! بۇل - ءبىزدىڭ ەلدىڭ مەدالى! بۇعان دەيىن ايتقانىمداي، مەن ءۇشىن وليمپيادا الەم كۋبوگى سەكىلدى سايىس. مۇندا ءبىز بۇكىل ماۋسىم بويى باسەكەلەسىپ جۇرەتىن سپورتشىلار جارىس جولىنا شىعادى. وليمپيادادا تەك نازار مەن كامەرالار كوبىرەك. ەندى حالىقارالىق ماڭىزدى ستارتتاردىڭ بارلىعىندا جۇلدەگە ىلىككەن سپورتشى رەتىندە مارتەبەگە يە بولدىم.

- 2022 -جىلعى بەيجىڭدە وتەتىن قىسقى وليمپيادا باراسىز با؟

- ول جاعى ءالى بەلگىلى بولا جاتار. ەندى ماعان الەم كۋبوگىنىڭ قالعان كەزەڭدەرىن اياقتاپ تاستاۋىم كەرەك.

اۆتورى ايان بەكەن ۇلى