حالىق ساداقا قابىلداۋ تەرمينالدارىنا دايىن با
نەگىزگى ماقسات - قارجىنىڭ اشىقتىعىن قامتاماسىز ەتۋ. الايدا اتالعان باستامانى حالىقتىڭ ءوزى قابىلداپ جاتقان جوق، دەپ حابارلايدى قازاقپارات ءتىلشىسى.
قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلىنىڭ ايتۋىنشا، ساداقا قابىلداۋ تەرمينالدارى پيلوتتىق جوبا اياسىندا استانا مەن الماتى قالالارىندا، سونداي-اق وبلىستاردىڭ ورتالىق مەشىتتەرىندە ورناتىلعان بولاتىن.
«بۇگىندە وسى تاجىريبەگە قاتىستى ەكى ماسەلەنى اتاپ وتۋگە بولادى. بىرىنشىدەن، تەرمينالداردا تەحنيكالىق اقاۋلىقتار بار. اتاپ ايتقاندا، ۇساق اقشا قابىلدانبايدى، تۇبىرتەك ۋاقىتىندا شىقپاي قالادى جانە تاعىسىن تاعى. ەكىنشىدەن، مەشىتكە كەلگەن جاماعات اللا رازىلىعى ءۇشىن بەرگەن اقشالاي ساداقاسىن جاريا ەتكەندى، ءيا بولماسا، تەرمينال ارقىلى تۇبىرتەگىن الىپ جاتقاندى قالامايدى. ويتكەنى ءبىزدىڭ اسىل دىنىمىزدە، جالپى قازاق حالقىنىڭ تانىم- تۇسىنىگىندە «وڭ قولىڭ بەرگەن ساداقانى سول قولىڭ بىلمەسىن» دەگەن ادەمى ناقىل بار. بۇل ءسوز پايعامباردىڭ (س. ع. س. ) حاديسىنەن الىنعان. سول سەبەپتى ساداقا بەرۋشىلەر ءوزىنىڭ ساۋاپتى امالىن باسقالاردىڭ بىلمەگەنىن، ياعني ءوزى مەن اللانىڭ اراسىنداعى قۇلشىلىقتىڭ قۇپيا بولىپ قالعانىن قالايدى»، - دەدى ا. قونارباي ۇلى قازاقپارات تىلشىسىنە بەرگەن سۇحباتىندا.
ونىڭ ايتۋىنشا، مەشىتتەردىڭ جانىنان قۇرىلعان ارنايى كوميسسيالار تەرمينال ارقىلى تۇسەتىن ساداقانى باقىلايدى.
كوميسسيانى قۇرامىنا بىرنەشە ادام كىرەدى. ولار قۇجاتتاردى راسىمدەپ، ەسەپ- قيسابىن جاسايدى.
«دەگەنمەن، بۇگىندە حالقىمىز ونداي جاڭا تەحنولوگيالارعا جاتىرقاپ قارايدى. سول سەبەپتى ساداقا قابىلداۋ تەرمينالدارىن تولىققاندى ىسكە قوسۋ ءۇشىن ءالى دە بىرنەشە جىل قاجەت. قازىردىڭ وزىندە تەرمينالدار بارلىق مەشىتتەردە ىستەپ تۇرعان جوق. ويتكەنى كەيبىر جەرلەردە تەحنيكالىق ماسەلەلەر تۋىندادى. ەندى، الداعى ۋاقىتتا وسى ەلەكتروندى جۇيەگە تولىعىمەن كوشەمىز بە، جوق پا، ونى ۋاقىتتىڭ ءوزى كورسەتەدى. سوسىن حالىقتىڭ كوزقاراسى دا ءوز سەپتىگىن تيگىزەدى»، - دەپ اتاپ كورسەتتى ا. قونارباي ۇلى.
